POEA wa una modawat og trabahante sa 3 ka kompaniya

GISUSPENSO sa Philippine Overseas Employment Administration (POEA) ang pagproseso sa mga mamumuo sa ilang Overseas Employment Certificate applications sa upat ka mga employer nga nagbase sa Kingdom of Saudi Arabia.

Si Evelia Durato, pangu sa POEA Regional Center for Visayas, niila sa upat ka mga kompaniya nga naglakip sa Mohammad Al Mojil Group, Mohammad Al Bargash Contracting, Saudi Bin Ladin Group ug Saudi Oger Limited.

Sa iyang report sa tigom sa Regional Coordinating Committee (RCC) sa Department of Labor and Employment 7, matod ni Durato, nga base sa ilang nadawat nga advisory gikan sa ilang ulohan nga buhatan, gatusan ka mga Overseas Filipino Workers ang wala mabayri sa ilang sweldo ug pabilin nga natanggong sa KSA.

Siya nipasabot nga gumikan sa maong kabalaka gihunong una nila ang paghikay sa mga OEC application sa mga OFW nga gusto motrabaho o mobalik og balik sa KSA ubos sa maong mga employer.

Ang OEC, usa ka rekisito ubos sa mga lagda ug regulasyon sa POEC aron pagseguro nga dokumentado ug mapanalipdan ang mga OFW sa ilang pagpanarbaho sa ubang nasod.

Bugtong ang mga OFW lang ang gikihanglan nga mokuha og OEC.

Si Durato nidugang nga nakadawat usab sila og advisory gikan sa Department of Foreign Affairs nga gipugngan una ang pagpadala ug paghikay sa mga OEC sa mga OFW nga gusto motrabaho sa Republic of South Sudan gumikan sa kaguliyang sa maong nasod.

Suma pa niini nga giisa na sa DFA ang crisis alert level sa South Sudan ngadto sa level 4.

Kini nagpasabot nga ipatuman na ang mandatory repatriation o pagmando sa mga Pinoy nga mamumuo nga mobiya na sa maong nasod ug total ban.