Emil’s Fiesta Cup sugdan karon
Mga duwa sa Sabado 7:00 pm. Aspa vs. Abrenica 8:00 pm. Samsam vs. ARQ Builders
HUGOT ug kulbahinam nga kombati ang gipaabot nga masaksihan karong gabii sa pagsugod sa 9th edition sa Emil’s Fiesta Cup basketball championships nga sa unang higayon anha ipahigayon sa Minglanilla Sports Complex.
Ang defending champion Samsam Gullas team nga posibling mokuha sa serbisyo ni kanhi PBA player Elloyd Poligrates ug Reed Juntilla mosugod sa pagdepensa sa titulo batok sa multi-titled SG-ARQ Builders ni Jason Arquizola nga langkuban usab sa mga beteranong commercial star sa Sugbo pinangulohan sa laing ex-PBA players nga sila si Jojo Tangkay ug Danny Aying.
Hinuon di pa gyud matino kon kinsa pa ang mga inilang mga basketbolista sa Sugbo ang mopakita og aksyon sanglit wa pa mopakita sa ilang kompletong lineup ang matag team.
Ang Aspa Scaffoldings ni Arnold Quilaton ug ang Abrenica Engineering ni Felix Abrenica maoy magsangka sa preliminary match nga sugdan sa alas 7 sa gabii.
Apan sa dili pa ang proper tournament, ang Cesafi four-time champion Sacred Heart School-Ateneo de Cebu Magis Eagles ug ang University of Cebu Baby Webmasters ang magtigi alang sa usa ka friendly exhibition match sa alas 6 sa hapon.
Usa ka tradisyonal nga opening ceremony maoy pormal nga moabli sa torneyo diin si Cebu 1st district congressman Samsam Gullas ug si Minglanilla Mayor Lannie Pena mopadungog sa ilang hamubong mensahe.
Inabagan sa local government unit (LGU) sa lungsod sa Minglanilla, ang tinuig nga torneyo isip halad sa pamilya ni sportsman/businessman Jerry Oberes sa kasaulogan sa kapistahan ni Sr. San Roque sa Brgy. Linaw-Lipata sa maong lungsod.