Baldwin pabiling coach sa Gilas
DILI mabangbang ang pagsalig sa Samahang Basketbol ng Pilipinas (SBP) kang Gilas Pilipinas headcoach Tab Baldwin.
Bisan sa kapakyasan sa Gilas pag-abante sa sunod round sa miaging FIBA Olympic Qualifying Tournament sa Manila, nagkanayon ang usa ka opisyal sa SBP nga wala sila’y rason nga putlon ang ilang kalambigitan kang Baldwin.
Nagkanayon si national team manager Butch Antonio nga magpabilin si Baldwin nga coach sa men’s national squad hangtod mahuman ang qualifers alang sa 2019 World Cup.
“As far as trust and confidence of SBP management with him, I guess (it’s a matter of) honoring the contract. We have to honor what’s simulated in the contract,” matod ni Antonio sa interbyu sa Spin.ph.
“It’s a four-year contract (2015-2018), and the program is still running under him.”
Daghan ang nakasaway kang Baldwin human pakyas siya sa paggiya sa Gilas nga makaabante sa semi-finals sa Olympic qualifier diin nakatilaw sila og duha ka sunodsunod nga pilde batok sa France ug New Zealand.
Nakadawat sab og mga pagsaway si Baldwin sa iyang pagpili og mga magduduwa alang sa 12-man Gilas lineup hilabi na dihang wala niya gilakip sa final lineup sila si Calvin Abueva sa Alaska Aces ug LA Tenorio sa Brgy. Ginebra Gin Kings, nga pareho na man untang nakapakita og maayong labok sa international competitions.
Gisaway sab si Baldwin dihang wala niya pasudla si 6’9” forward Japeth Aguilar sa 84-93 nga kapildihan sa Gilas batok sa France nga gipangulohan ni NBA superstar Tony Parker.
Nasayod si Antonio sa mga pagsaway nga nadawat ni Baldwin apan alang kaniya, sa matag duwa sa Gilas, adunay leksyon nga angayang makat-unan.
“Continue learning. I think Tab is a student of the game, and maybe we’re hoping he’s learned something from this experience with us in the OQT,” asoy ni Antonio. “Kung ano yung mga magandang nagawa niya, kung ano ang mga pagkukulang, not even in the perception of what people think, but siguro him as a coach. I’m sure alam na rin nila kung saan sila nagkulang at kung saan pa dapat meron diin.”
Nagkanayon si Antonio nga inig balik ni SBP outgoing president Manny Pangilinan gikan sa business trip, maghugpong sila kon unsa pa’y angayang himuong lakang alang sa kaayuhan sa Gilas.