Slaughter gihulipan ni Asi Taulava

GIHULIPAN ni Asi Taulava si Greg Slaughter sa starting center nga posisyon sa South squad alang sa Philippine Basketball Association (PBA) All-Star game nga ipahigayon karong Agusto 7 sa Araneta Coliseum.

Kini maoy ika-14 nga higayon nga naapil sa All-Star Game ang 43 anyos nga Fil-Tongan, kansang inahan lumad nga taga Samar Province.

Ang beteranong pambato sa NLEX Road Warriors makig-uban nila ni JuneMar Fajardo sa San Miguel Beermen, Joe Devance ug Scottie Thompson sa Brgy. Ginebra Gin Kings, ug James Yap sa Star Hotshots sa starting unit sa South.

Si Slaughter maoy giboto sa mga sumosunod sa starting five apan dili kini makaapil kay padayon pa kining nagpaalim human sa iyang operasyon (ankle) sa off-season.

Ang mga reserba sa South mao sila si Jeff Chan, JR Quinahan, Jericho Cruz, Chris Ross, Mark Barroca, RR Garcia, ug Carlo Lastimosa. Si San Miguel coach Leo Austria maoy mogiya sa team.Ang starting unit sa North mao sila si Japeth Aguilar ug Mark Caguioa sa GInebra, Marc Pingris sa Star, Calvin Abueva sa Alaska Aces, ug Terrence Romeo.