BINUKBOKAY NA
Tepora andam modepensa sa iyang bakus; Demecillo, Lagos magtakos sab
DEPENSAAN na ni Omega fighter Jhack Tepora ang iyang World Boxing Organization (WBO) Asia Pacific Youth super bantamweight title batok kang Bryan Capangpangan karong gabii sa main event sa Who’s Next? Pro Boxing Series 2 sa Robinson’s Galleria Cebu Atrium.
Kini maoy labing unang depensa ni Tepora sa korona nga iyang naangkon pinaagi sa 5th round knockout nga kadaugan batok kang Jason Tinampay niadto lang Marso 6 sa unang edisyon sa promosyon nga gipasiugdahan sa Omega Pro Sports International.
Kagahapon sa official weigh-in sa Robinson’s Fuente, ang kampo ni Tepora mingbati og kabalaka dihang overweight og usa ka pound sa 122 pounds weight limit ang ilang batos sa inisyal nilang pagtimbang.
Hinuon sa unang pagtimbang ni Tepora, nihaom ra siya sa weight limit samtang si Capangpangan adunay 120 ½ pounds nga gibug-aton.
“Ako ra mang giihi ang usa ka pound,” matod ni Tepora, kinsa adunay impresibong 170, 12KOs nga rekord.
Gipasabot ni Tepora nga bisa’g naoverweight siya’g gamay, iyang gitataw nga dili kini makaapekto sa iyang away ug masaligon siyang molampos siya pagdepensa sa iyang titulo.
“Kon dili nako siya ma-knockout, daugon nako sa puntos pero kon naay poruhan, akoa gyud siyang i-knockout,” dugang sa 23 anyos nga si Tepora.
Giangkon ni Tepora nga wala siya nakakita sa inawayan ni Capangpangan, hinuon sa iyang nasayran, usa kini ka agresibo nga boksidor.
Matod niya nga sa iyang tan-aw, mas maayo nga boksidor si Capangpangan kumpara kang Tinampay apan wala siya nabalaka niini.
Si Capangpangan, kinsa adunay 10-21, 7KOs nga rekord, nagkanayon nga iyang giestudyohan ang estilo ni Tepora pinaagi sa pagtan-aw sa YouTube.
“Kahibalo ko nga undefeated siya pero gamitan nako siya og utok kay chance na ni nako nga mailog ang bakus,” matod ni Capangpangan, kinsa naglaraw nga moataki sa tiyan ni Tepora.
Sa co-main event, depensaan ni Kenny Demecillo (10-3-2, 7 KOs) World Boxing Federation (WBF) Asia Pacific bantamweight title batok kang Rambo Lagos (8-1-2, 5KOs).
Usa sa giatangan sa promosyon mao ang labing unang away ni kanhi Olympian Mark Anthony Barriga isip professional boxer.
Si Barriga masubhan batok kang makigbatok kang Melvin Mananquil.
Magsumbagay sab sila si Christian Aranetabatok Charlie Cabilla, Jimboy Haya batok Fabio Marfa, Feljun “Baby Face” Taneo batok Lenmar Prescillas, TomJune “Warrior” Mangubat batok Arnel Acebuque, Mark Vicelles batok Jesrel Corabal ug Marjun Piencenaves batok Andrei Navarro.
Ang ubang away sa promosyon buhian sa alas 4:00 sa hapon.