COMELEC GIDUGOK SA NAGPAREHISTRO
EXTENSION. Mga batan-on nga nagparehistro kagahapon sa Commission on Elections (Comelec) nanagdala og placards nga nanghangyo nga lugwayan ang ilang registration alang sa Sangguniang Kabataan (SK). Gatusan pa ang wa pa marehistro kagahapon nga niaguwanta sa paglinya sayo pa sa buntag.
KAPIN Sa 4,000 ka mga tawo ang gustong magparehistro ang nidagsa sa buhatan sa Commission on Elections (Comelec) Cebu City para sa umaabot nga barangay ug Sangguniang Kabataan (SK) elections kagahapon.
Kini ang gibutyag ni Atty. Marchel Sarno, election officer sa north district, kinsa nagkanayon nga nag- cut-off sila og alas 8:30 sa buntag gumikan sa kadaghan sa gustong magparehistro ug sagad kanila mga tinun-an sa high school ug college.
Apan gipadayag sa election officer nga bisan pa og ila nang gibalibaran ang sobra sa gidaghanon sa labing daghan nilang marehistro, ang uban wala gihapon mamauli ug namasin nga marehistro hinungdan nga naghuot ang atubangan nga bahin sa Comelec sa Osmeña boulevard ug ang linya sa mga tawo nituyok na sa edepisyo nga ilang giukopahan.
Gituyo sa Comelec nga magbutang sila og cutoff time aron usab nga dili na mahago og linya ang ubang gustong magparehistro nga dili na maatiman sanglit mausik lang ang ilang panahon.
Gitug-an ni Sarno nga labing daghan nga marehistro sa north ug south district kapin o kulang 3,000 ka mga aplikante ug adunay 1,000 usab nga dili na nila maatiman sa katapusang adlaw sa rehistrasyon.
Gipadayag sa election officer sa north district nga ila nang napanglantawan nga maghuot ang mga tawo kagahapon. Iyang gihulagway nga mas daghan pa ang magparehistro sa barangay kon itandi sa local ug national elections.
Dugang niya nga dili na bag-o alang kanila ang maong matang sa sitwasyon sanglit mao kini ang mahitabo sa matag katapusang adlaw sa pagpangrehistro.
Iyang gibutyag nga wala sila magkuwang sa pagpahibawo sa publiko bahin sa rehistrasyon apan iyang gihulagway nga sobra usab kadaghan ang batan-on nga gustong mosalmot sa piniliay ug gikuwang ang 15 ka adlaw nga gihatag sa Comelec para makarehistro.