CEBU CITY ‘DEATH SQUAD’

Nagbilin og paskin sa `pusher’ nga gipatay; pulis wa motuo, moimbestigar

NAGPAILANG mga vigilante nga nagtawag sa kaugalingon og Cebu City Death Squad nipusil patay sa gidudahang drug pusher ug user nga nag-inom uban sa iyang mga higala kagahapon sa kaadlawon.

Apan ang kapulisan di motuo nga mga vigilante ang ningpatay kang Rogel Nudalo, 38, panday, sa may Sityo Kadahoan, Brgy. Talamban, Dakbayan sa Sugbo.

Matod pang Cebu City Police Office director Sr. Supt. Joel Doria nga hayan hinimo-himo ra kini, apan iya nang gipaimbestigar ang sunodsunod nga mga pagpatay dinhi sa siyudad.

Matod ni PO3 Edario Manatad ug mga kauban sa Homicide Section, nag-inom si Nudalo uban sa iyang mga higala nga nailhan lang nga Dionesio ug Titing.

Usa ka motorsiklo ang niabot ug giiwagan sa driver sa suga ang grupo ni Nudalo. Nikanaog ang angkas dayon niduol kanila ni Nudalo. Ang gunman niatubang kang Dionesio ug niingon nga ‘ pahawa diha kay wa kay labot’ ug mibunot sa armas dayon nipusil makadaghan kang Nudalo.

Ang killer daling nisakay og balik sa motorsiklo, apan nagbilin una og paskin nga gisuwat sa karton, duol sa lawas ni Nudalo nga gisuwatan og `pushe, carnapper, akyat bahay' ug nagpailang CCDS.

Matod ni Manatad nga gisusi na sa Talamban police ang record ni Nudalo.

Upat ka mga kabhang sa bala gikan sa armas nga 9mm ang napalgan sa dapit nga nahitaboan.

GINAGMAY RA

Samtang ang hepe sa Talamban Police Station nga si Sr. Insp. Edward Sanchez nikompirmar sa Superbalita Cebu nga usa ka user ug pusher si Nudalo.

Apan si Sanchez kinsa nilingkod isip hepe niadtong Miyerkules, di makakompirmar kon lakip ba sa watchlist nila si Nudalo tungod kay wala pa siya makakita sa lista nila.

Hinuon di dinagkuay ang pagpamaligya ni Nudalo ug usa lang kini ka street pusher.

Nagdumili usab pagkomentaryo si Sanchez kon unsa ka tinuod nga aduna na’y vigilante sa Sugbo kun Cebu City Death Squad nga mao ang giingon nga nagpatay kang Nudalo.

Apan nagkanayon siya nga posibleng nisakay ang mga vigilante sa kampanya sa kapulisan batok sa ilegal nga drugas ug gipangpatay ang nalambigit.

Dugang niya nga posibleng unay-unay usab ang nahitabo ug kauban ra sa grupo ang mga killer ug ang ilang mga target nakatambling kun wa kabayad sa drugas.

Nagpadayon hinuon ang imbestigasyon sa Talamban Police sa maong hitabo ug padayon usab sila sa ilang programa batok sa ilegal nga drugas.

Kagahapon, gitapok sa Talamban gym ang mga nisurender sa Oplan Tokhang nila lukop sa walo ka mga barangay nga ginsakopan sa maong estasyon.

Si Doria nagkanayon nga base sa ilang pasiunang nakuha nga kasayuran posible nga di vigialante ang nagpaila nga sakop sa grupong CCDS.

“Pinapaimbistigahan ko na po yon kasi parang gawagawa lang, parang naglagay lang para gayagaya kung sinong hoodlum dyan. Sa Manila, daming ganoon. Sa Davao meron din, dito ginagaya siguro,” matod ni Doria.

Samtang gipadayag ni Konsehal Dave Tumulak, chairman sa committee on peace and order sa City Council, nga nakigtagbo na siya ni PRO 7 director, Chief Supt. Noli Taliño ug kang Doria aron mahatagan og solusyon ang sunodsunod nga mga pagpatay.

“Among gihisgutan ang recent killings para mapugngan ug mahunong na. Usa kana sa pagpakita nga dako kaayo og sipyat ang atong balaod nga moresulta na sa ingon ana. Dili maayo sa mga negusyante kay makamugna og bati nga imahi ug peligro kaayo nga adunay madamay nga sibilyan,” paghulagway ni Tumulak.

Si Doria, sa iyang bahin, niangkon nga dako ang kuwang sa gidaghanon sa iyang mga ginsakpan gumikan usab sa kadako sa ilang area of responsibility.

Giawhag ni Tumulak ang nagpailang vigilantes nga itugyan ngadto sa kapulisan ang pagpatuman sa balaod, ug di nila ikumkom sa ilang mga kamot.