Pugante sa CPDRC wa pa madakpi

GUMIKAN sa iyang pagpuga, patungan og walo ka tuig ang pagkabilanggo ni Arnel Mait, kinsa mieskapo sa Cebu Provincial Detention and Rehabilitation Center.

Siya nagatubang og kasong kalapasan sa Sections 5 ug 11 sa Republic Act 9165 kun Comprehensive Dangerous Drugs Act, nga way gitugot nga piyansa.

Si Marco Toral, consultant sa CPDRC, niingon nga bisan og motahan sa iyang kaugalingon si Mait, dugang walo ka tuig ang pagkabilanggo niini tungod kay nipuga kini sa prisohan. “Kay basta escapee, mao nay silot nila,” pahayag sa consultant sa pakighinabi sa Superbalita Cebu. Alas 6 sa buntag kagahapon, didto sila si Toral sa balay sa amahan ni Mait sa bukirang barangay sa Calatrava, Negros Occidental, mga 6 kilometros ang ilang paglakaw gikan sa highway.

Matod ni Toral nagbilin og suwat si Mait sa iyang amahan nga nagpadayag og kalipay ug nagpahibawo nga nagbilin kini og prito nga isda.

“Sa iyang suwat nisulti siya nga nalipay siya nakagakos sa iyang amahan,” asoy ni Toral.

Siya nibutyag nga upat ka mga tawo ang kuyogkuyog ni Mait sa pagbiyahe niini.

Si Toral nabalaka nga basin og mobalik sa pagpanulis ang mipuga nga priso labi na kon aduna kini gidala nga armas.

Si Mait nipasalig nga kon motahan sa iyang kaugalingon adto kini ni Toral, apan wa motino kon kanusa.

Sa wala pa masikop, si Mait gitumbok nga responsabli sa pagpanulis sa Argao ug pipila ka lugar sa Negros Occidental.

Si Toral nanghinaut nga mosurender na si Mait sa dili pa mauwahi ang tanan diin kanunay kini mipadayag nga motahan sa higayon makontak sa jail guard sa CPDRC.

Si Mait nakapuga niadtong Lunes sa buntag pinaagi sa paggamit og visitor’s pass nga wa mabantayi sa mga security guard.

Gawas sa pass, duna pa siyay tamla sa bukton nga alang gihapon sa mga bisita.

Tungod sa iyang pageskapo, gisuspenso sa kadagkuan sa CPDRC ang mga dalaw.

Mga blue guard nga nagbantay sa entrance sa pasilidad gipailisan nila ni Toral tungod sa mao nga hitabo.

Ila pang gihugtan ang seguridad sa bilanggoan tungod sa mao nga hitabo.

Niadtong Martes ug Miyerkules nagsugod ang negusasyon sa pagtahan ni Mait, apan pulos napakyas bisan kon gipaapil na og hangyo ang iyang asawa. Nitanyag pa si Toral sa pagtabang sa iyang pamilya. Si Toral nikompirmar nga dunay bahad si Mait sa usa ka pulis sa Argao nga maninawos tungod sa pagdakop kaniya.