Talisay Fish Port gustong gamiton ni Mayor Gullas

GUSTO karon sa kagamhanan sa dakbayan sa Talisay nga gamiton na ang kontrobersiyal nga Talisay Fish Port diin ang Siyudad maoy makapahimulos ug maka-benispisyo ilabi na ang ilang mga mananagat.

Samtang giklaro ni Mayor Eduardo Gullas nga ang adunay katungod nga manag-iya sa Talisay Fish Port mao ang Talisay City.

Nasayran ang Talisay Fish Port gigastuhan og P716 milyones ug diuhang natukod panahon pa ni Gullas apan wala magamit hangtod karon.

Samtang gitugtan sa miaging administrasyon ni kanhi mayor Johnny de los Reyes nga abangan sa Asian Marine Transport Corp. sulod sa 25 ka tuig sa tag P800,000 ang matag buwan.

Apan sa wala pa napirmahi, nahimo kining kontrobersiyal human nga ang magpapatigayon nga tag-iya sa Asian Marine Transport Corp. migisi sa tseke nga mokabat sa P9.8 milyones atubangan sa mga opisyal sa Talisay ug mihulagway sa kagamhanan sa Talisay nga masakiton.

Kini human wala madayon nianang buntag ang ila na untang pirmahan nga memorandum of agreement aron maoy mo- operate sa Talisay Fish Port nga himuon nang pantalan sa mga roro vessel tungod kay wala motunga ang kampo ni Mayor Delos Reyes.

Si Gullas niingon nga gusto niyang gamiton na kini sa iya karong administrasyon.

Matod niya nga mas maayo nga makuwartahan kini ug ang makapahimulos mao ang ilang mga mananagat sa Talisay.

Apan si Mayor Gullas miingon nga maayong tun-an ug tan-awon ang unod sa MOA nga gipirmahan sa Siyudad talisay sa magpapatigayon nga si Rodriguez.

Matod niya nga nakaila siya kang Rodriguez apan di sila suod .

Gipasabot sa mayor nga dili usab siya gusto nga molapas MOA nga gipirmahan sa miaging administrasyon tungod kay legal kini ug nahadlok siya nga makalapas siya sa balaod.

Nagkanayon si Gullas nga ang legal department maoy tahasan sa paglili sa kasabotan alang sa sunod nilang lakang.

Apan sa isyu kon si kinsa ang tag-iya sa Talisay Fish Port gibarugan ni Gullas nga sila sa sa Talisay.