Hepe sa Veterinary sa Talisay hatagan og police escort

KONSEHO sa dakbayan sa Talisay mipalabang og usa ka resulosyon nga hatagag police escort ang Talisay City Veterinarian’s Office.

Kini ilabi na kon aduna silay himuong operations batok sa mga manindahayg “hot meat” human sila makadawat og hulga sa ilang kinabuhi.

Si Dr. Santiago Hortel, Talisay City veterinarian, nibutyag nga kini tungod sa ilang subsob nga operation batok niadtong mga hot meat nga gipamaligya diha sa kamerkadohan sa Talisay ug sa Tabunok.

Ang usa sa ilang sakop sa task force, nakadawat og hulga tungod kay matod ni Hortel nga dili malikayan nga makadawat na sila og hulga.

Tungod kay adunay ubang manindahay nga masuko kon dakpon ug diha na ang pagpanghulga.

”Among Task Force gamit verbal lang or kanang baid-bairan pa ka og kutsilyo sa ilang atubangan,” matod ni Hortel.

Ang labing uwahing operation nga gihimo sa task force nakasakmit sila og 65 ka kilong karne gikan sa merkado sa Tabunok.