‘No contact apprehension policy ordinance’ mipasar sa konseho sa Mandaue

‘NO contact apprehension policy ordinance’ sa dakbayan sa Mandaue giaprobahan sa ikaduha ug katapusang pagbasa niini sa konseho niadtong Miyerkules.

Kini nagpasabot nga sa di madugay, mga closed-circuit television (CCTV) sa dakbayan sa Mandaue ang mokuha og hulagway sa mga motorista nga nilapas sa balaud trapiko pinaagi sa paghulagway sa plate number sa sakyanan niini.

Ang masakpang nilapas sa balaod sa dan di na dakpon sa mga enforcer tungod kay matod pa makapasamot lang kini sa kahuot sa trapiko apan sa maong tahas, padad-an nalang kini og citation ticket sa ilang tagsa-tagsa ka panimay ang mga drayber o tag-iya sa sakyanan.

Nasuta ning mantalaan nga posibleng mapirmahan na unya ni Mayor Luigi Quisumbing ang maong ordinansa karong semanaha nunot sa dinaliang pagpatuman niini, sumala pa ni Jeany Eve Ynot, public information officer sa city hall.

Gitataw nga sa maong polisiya, kon di mobayad sa multa ang drayber o tag-iya sa sakyanan nga nilapas sa trapik, ireklamo kini sa dakbayan ngadto sa buhatan sa Land Transportation Office (LTO) 7 aron di na maka-renew og lisensya ug rehistro sa ilang sakyanan.

Matod ni Glenn Antigua, operations head sa Traffic Enforcement Agency of Mandaue (TEAM) nga kon pakyas gihapon sa pag-atiman sa ilang kalapasan ang motorista, mahimo kininilang pasakaan og kaso sa korte.

Paambit ni Antigua nga sagad nga traffic violation nga ilang makita sa CCTV sa command center mao ang pag-apas sa red light, pagbabag sa dan, pataka og hunong sa sakyanan, patakag parking ug uban pa.

Sa iyang bahin, gibutyag ni Mayor Quisumbing nga ilang gipanglantawang makapagaan sa dagan sa trapiko sa kadalanan sa dakbayan ang maong tahas.

LOADING, UNLOADING

Giklaro usab ni Antigua sa mga tigbalita ang taho nga sa mga terminal nalang unya makapasakay ug pakanaog og pasahero ang mga jeep nga moagi sa dakbayan.

Kini human may nigawas nga sayop nga taho kabahin niini.

Paambit ni Antigua sa mga tigbalita nga magpadayong gamiton ang mga loading ug unloading nga dapit sa dakbayan ilabi na ang legal nga mga terminal sa pipila ka mall sa dakbayan.

Saysay niya nga ang pasabot niya niadto nga estriktuhon unya sa TEAM ang pagpataka og pasakay ug pakanaog og pasahero sa mga drayber ngadto sa “No-stopping zones”.

Nibahad usab si Antigua sa mga drayber nga di mopasakay ug mopakanaug og mga pasahero sa mga ‘iligal nga terminal’ nga sagad makit-an sa May DM Cortes ug dalan Plaridel diin sagad sa mga sakyanan nga masigpatan sa TEAM mao ang gikan ug paingon sa dakbayan sa Lapu-Lapu.