Vigilantes
TINUOD ba nga aduna gyoy vigilantes nga naglihok na karon diri sa dakbayan sa Sugbo nga maoy responsable aning sunod-sunod nga pagpamatay sa mga tawo nga gidudahang naghilambigit sa illegal nga drugas? Unsa man kining vigilantes? Matod pa sa iningles: vigilantes is a member of a self-appointed group or citizens who undertake law enforcement function in their community without legal authority. Typically, because the legal agencies are thought to be inadequate. Buot ipasabot nga grupo kini sa mga tawo nga mikumkom sa balaod sa pagpuhag sa mga dautang elemento sa katilingban. Wala kini gitugot sa balaod.
Kinsa man kining maong mga vigilantes nga nagoperate karon dinhi sa dakbayan kon aduna man ugaling? Aduna ba kini silay lider nga nagmando kanila o sila-sila lang? Nganong kursunada man kini sila? Dili ba kaha mga awtoridad lang usab ang nagpaluyo nila? Kinsa man ang nag-finance sa ilang operasyon nga dilikado man kini? Nahibalo kaha ang atong mga lokal nga opisyal o ang kapulisan kabahin kanila? Mao kini ang mga pangutana nga lisod kaayong tubagon.
Niadtong 2004 mitumaw na kining maong grupo diin mokabat ngadto sa 100 ka mga police character ang ilang natumba. Gidudahan kaniadto nga mga pulis ra usab ang nagpa-ilang vigilantes. Ambot kon unsa ka tinuod? Misiaw kadto sila kay aduna may nagpaluyo nga pulitiko. Karon, mibalik na usab sa puwesto ang maong pulitiko. Ug mao ra usab kaha gihapon kining mga tawhana nga naglihok karon?
Dili tanan sa 54 ka napatay nga mga drug personalities sa tibuok rehiyon binuhatan sa kapulisan atol sa usa ka legitimate operation. Ang rason sa kapulisan nga ilang napatay ang ilang subject gumikan kay misukol. Adunay uban nga gipatay sa mga tawo nga nagtaptap nga gituohan lagi nga vigilantes. Vigilantes ba gyud kaha o mga druglord o ba kaha laing grupo sa mga nahilambigit sa illegal drugs ang mipapatay kanila? Buot ipasabot nga nag-unay na kini sila kay ang ubang mga drug pusher wala mo-remit sa ilang halin ngadto sa ilang amo. Kanang termino nga mitambling. O gumikan sa away sa teritoryo?
Sa pagkakaron lisud pa kaayong akusahan kon kining ubang pagpamatay binuhatan ba sa vigilantes. Binuhatan ba sa pulis, vigilantes o panagribal sa illegal nga negosyo sa drugas? Usa ra ang labing klaro niini nga ang gipamatay mga durugista. Maayo ba kining gihimo sa vigilantes nga ilang gikumkom ang balaod sa ilang mga kamot? Kon aduna may vigilantes, ang angay nga mahadlok niini kadto lamang mga tawo nga adunay dautang binuhatan. Pero mas maayo unta nga kadtong mga dagkong druglord ang ilang isunod og likidar.