Disiplina gikinahanglan

BISAN wa pa moasumer si Presidente Rodrigo Duterte, duna nay plano sa paghatag kaniya og emergency powers aron pagsulbad sa suliran sa trapiko dinhi sa nasod.

Ang dagkong urban centers, labina sa Metro Manila ug Metro Cebu, nag-atubang og dakong suliran sa trapiko tungod sa nagkadaghan nga mga sakyanan ug pipila lang ka dalan ang napalapdan.

Mas paspas ang pagdaghan sa mga sakyanan kay sa pagpalapad ug paghimo og bag-ong mga karsada.

Sa pagtuon, nasuta nga binilyon ang alkanse kada adlaw sa trapiko didto sa Metro Manila. Mao usab tingali dinhi sa Sugbo bisan kon wa pay pagtuon nga gipahigayon.

Makuha-kuhaan unta ang atong kalbaryo kon dunay disiplina sa karsada. Tan-awa ra, kon dunay grabeng kahuot sa trapiko, anha nimo makita ang pagpaugatay sa mga driver, kon kinsa ang makauna ug kinsay mas isog.

Usa sa mga dako og natampo sa trapiko mao ang mga aksidente. Malikayan kini kon di pa magtaboktabok og lanes ang mga sakyanan ug di usab grabeng makapakusog sa dagan.

Apan tungod sa kakuwang sa disiplina ug kahakog sa tawo nga gidala diha sa karsada, kini nahitabo.

Kon ipatigbabaw unta sa matag usa nga nagmaneho og sakyanan ang disiplina ug pagpakabana, hayan di ingon niani kagrabe ang suliran sa trapiko.

Nia pa diay laing dako nga problema. Ang atong mga karsada gihimong parking area sa daghang mga tag-iya og sakyanan nga way kaparkingan.

Naa tuoy pagpalapad sa mga karsada, apan wa magamit kay gihimong parking area.

Bitaw, ang karsada gipalapdan aron mas moluag ang agianan, di aron himuong parkingan sa mga sakyanan.