Buhong sa Dios
Binasi sa Ecclesiastes 1:2; 2:2123; Salmo 90; Taga-Colosas 3:1-5, 9-11; ug Lucas 12:13-21
NIADTONG milabay nga Lunes may usa ka panaghugpong sa Barangay Subangdako, Dakbayan sa Mandaue. Nagkapundok ang kapin kon kulang 120 ka buok tawo: mga 20 ka buok “surrenderees”, pipila ka mga pulis, mga opisyales sa barangay, mga magsasayaw sa Zumba. mga sakop sa duha ka kalihukan alang sa kabag-ohan, ug mga 30 ka buok sakop sa gitawag nga Narcotics Anonymous kun NA, usa ka “support group” alang sa mga ga-adisadis nga buot nang mohunong sa ilang bisyo.
Nagsugod ang panagpundok didto sa “football field” sa San Roque parish diin ang grupo naghimog “brisk walk” ug Zumba. Human niini nanglakaw sila padulong sa “barangay hall” diin naminaw sila sa pagsaysay sa usa ka “recovering addict” mahitungod sa epekto sa drogas ngadto kaniya ug sa iyang panaw balik sa normal nga katilingban. Gisundan kini sa usa ka “boodle fight” diin ang panihapon gilatag sa dahon sa saging ug nagdungan og kaon ang tanan samtang gabarog.
Taliwala niini may gipanghugpong nga upat ka buok gagmayng pundok diin nagpaambit ang mga sakop sa NA sa ilang mga kasinatian. Gidasig nila ang mga “surrenderees” sa paghimog sa usab. Gisagolan pod ni og tulo nga mubo nga mga salida sa video mahitungod sa pagbarog bisan nahugno na, ang pagkamahinungdanon sa tabang sa kauban sa banay, ug ang tabang nga gikinahanglan gikan sa katilingban.
Daghan kaayong natandog sa maong panaghugpong. Kon ang ginadiling drogas man god, makapabuwagbuwag sa mga sakop sa katilingban, sugod diha sa banay, ang maong panaghugpong misugod sa proseso sa panaghiusa. Buhong kini sa paglaom. Buhong kini sa Dios.
Sukwahi ang kinaiya sa tawo sa ebanghelyo. Dili siya buhong sa Dios kondili sa kaugalingon. Di man hinuon ngilad nang magmalampuson sa patigayon, sama niining tawhana. Nag-awas-awas gyod hinuon ang iyang salapi kay maayo ang abot sa iyang umahan. Apan kon subayon nato ang iyang mga pulong makita nato nga puno siya sa kaugalingon lamang: “Hoy Tawo, aduna kay daghang katigayonan nga gitagana alang sa daghang mga tuig; pahayahay, kaon, inom, paglulinghayaw.” Tiaw mo na ang iyang kakulokabildo ang iyang kaugalingon lamang!
Gani makanapulo niya gamita ang mga “ako” o “akong” o “nako” diha sa iyang pagkulokabildo sa kaugalingon. Buhong siya sa kaugalingon ug wala niya hatagig pagtagad ang uban ug ang Dios. Mao kini ang gitawag nga kahakog nga walay pagpakabana. Diha sa Bibliya ang kahakog nagagikan sa kasingkasing, daghan madaot, ug usa kini ka matang sa pagsimba sa mga diosdios.
Gihisgotan diha sa libro ni Ecclesiastes ang tawo nga nagpunay og budlay apan inigkamatay niya lain ang manag-iya sa iyang gibilin nga katigayonan. Mao kini ang “alisngaw sa alisngaw” sa pulong pa sa manunulat. Wa gyoy kapuslanan.
Mao kini nga sumala pa sa sulat ngadto sa mga taga-Colosas, “Sanglit gibanhaw na man kamo uban ni Cristo, tinguhaa ang mga butang nga atoa sa langit diin naglingkod si Cristo sa iyang trono sa tuo sa Dios. Hunahunaa ang mga butang langitnon, dili ang yutan-on.” Kinahanglan mabag-o diay ang atong mga panghunahuna aron adunay kabag-ohan ang atong kinabuhi ug katilingban.
Kadtong nahitabo sa Subangdako sugod pa lamang sa kabag-ohan nga atong gidamgo alang sa atong mga kaubang Pilipino nga giulipon sa ginadiling drogas. Apas mas dako pa gyod ang atong trabahuonon diha sa atong mga pamilya nga mao untay unang panagang batok sa ilegal nga drogas.
Mabag-o sad unta ang mga kasingkasing ilabina gayod sa mga “drug lords” kay gikan nila ang lintunganay sa kahiwian sa ginadiling drogas. Kinahanglan mapamatud-an pa sa gobyerno nga ang giakusahan sa NBI nga Peter Lim diri sa Sugbo sad-an ba o inosente. Kinsa man gyod diay ang nagpapatay kang Bernard Liu ug Ananias Dy nga kanhiay duha ka trabahante nga andam na untang motestigo batok sa ilang kanhiayng agalon?
�Kahakog nga walay gyoy pagpakabana ang nagpaluyo sa mga tawo nga maoy miduso sa patigayon sa ginadiling drogas. Ginoo tabangi kami!