Ayaw padala sa kasuko

NAAY black eye si Vhon Martin Tanto, ang driver sa pula nga awto, nga nikulata ug nipusil-patay kang Mark Vincent Garalde dihang gipaatubang kini sa mga sakop sa media ug kang PNP Chief Ronald ‘Bato’ dela Rosa.

Matod pa, malinawon kining nisurender dihang na- corner didto sa Milagros, Masbate diin siya nitago human sa maduguong insidente Lunes sa gabii didto sa Quiapo, Manila. Nidakop kaniya ang usa ka yunit sa Army ug lokal nga kapulisan.

Si Tanto maoy gihimong ehemplo sa kapulisan nga kon malinawong motahan kon dakpon, di ka mamatay. Bitaw, mas maayong buhi bahala nag ma- black eye.

Ang ato lang nga angayan sab nga panaminan ang nahitabo sa biktima sa giingong road rage nga si Garalde nga wa biyae ni Tanto kon wala mamatay.

Duna pay bystander nga naigo ug sa pagkakaron, naa pa sa hospital.

Matod ni Tanto dihang nahinabi og sakop sa media, napawong ang iyang panan-aw sa kasuko sa nagbisikleta mao nga iya kining napatay.

Isip usa ka reservist, dunay training man unta kini si Tanto kabahin sa mga engkwentro mao nga mas duna unta siyay pasensya alang sa mga sibilyan.

Apan mura siyag gamayng bata nga nagpadala sa kalagot. Maayo unta kon wala siyay dalang armas kon ingon siya niini kainit og ulo.

Bisan pa man, makutlo nga pagtulun-an niining maong hitabo mao ang kanunay nga dili magpadala sa kalagot diha sa kadalanan.

Ako mismo nakasinati niining mga makalagot nga kahimtang sa kadalanan labi na kon dunay moabuso ug mamintaha. Apan, mas maayo kon pugngan na lang gyud ang kalagot.

ENGKWENTRO

Duha lang ka adlaw human nianunsyo si Presidente Rody Duterte og usa ka unilateral ceasefire diha sa iyang State of the Nation Address (Sona) sa miaging Lunes, nahitabo kining maduguong engkuwentro tali sa New People’s Army (NPA) ug mga elemento sa Cafgu didto sa Kapalong, Davao del Norte.

Usa ka militia ang namatay ug pipila ang mga nangaangol.

Wala maglangay si Presidente Duterte sa pagbisita dayon sa mga sakop sa Cafgu. Hangtod karong pagkasulata, wala pay nabalita nga pamahayag ang mga rebelde isip tubag sa iyang ultimatum.

Alang kanako, sa tayming lang sa maong engkwentro, nasayop ang mga rebelde sa pagengage sa maong mga Cafgu.

Lalim bay, sa maong enkwentro, negatibo ang politikanhong epekto niini. Bisan pa man og active defense ang palisiya nga gipatigbabaw, klaro unta alang sa mga rebolusyonaryo nga ang matag aksyon militar motumong sa politikanhong bentaha alang sa mga rebelde.

Ang mga rebolusyonaryo unta ang mas dunay pasensya kon duna may provocation ang pipila ka Cafgu.

Offhand, angayang magpahamtang dayon ang liderato sa mga rebelde og disciplinary action alang sa mga sundawong apil sa maong engkwentro.

Sa niining paagi, makapakita ang liderato sa mga rebelde og gesture nga goodwill isip bawos sa unilateral ceasefire nga gimando ni Presidente Duterte.

Sa laing bahin, kon importante man sa presidente ang pagpatigbabaw sa kalinaw, sabton sab niya ang kalisdanan sa komunikasyon ug kining mga protocol sa mga rebelde nga kinahanglang mahisgutan sa saktong kolektibo.

Di baya lalim ang koordinasyon diha sa kabukiran.

Bisan pa man, malaumon ako sa pagkakaron nga magpadayon ang proseso alang sa kalinaw. Apan kinahanglang magpakita ang duha ka habig sa ilang kaseryuso sa pagpatigbabaw sa prinsipyo ug dili magpadala sa kainit sa ulo.

Duna pay mas dagkong mga babag sa kalinaw gawas niining maong engkwentro. Apan, alang kanako, kinahanglang mopatigbabaw ang kalinaw.