Pagpangandam

SA Facebook ko pirme updated sa mga ride sa akong mga higala, kinsay nagupgrade ug kinsay nag-ilis og tibuok biseklita. Igo ra ko ron sa pagtan-aw tungod sa mga kakulian. Apan duna na koy signal sa akong kumander nga mohinayhinay na og balik og sikad kay siyay naluoy sa akong bike nga naputos na sa abog.

Kay mobalik, mag-inusara lang gihapon una ko kay akoy nakuyawan nga nagtan-aw sa among grupo nga kon di lagyo, magsuotsuot bisan asa basta medyo duol ra ang biyahe. Buot kong ipasabot sa duol, kanang kabukiran sa Cebu City, Mandaue, Consolacion, Liloan ug Danao.

Magkadugay ka gud og sikad, magkakuwang ang imong feeling sa pagtindak. Bisan gani kanang bag-o pa kong mobalik, makuwangan ko kay para nako duol ra ang biyahe kon mahiabot na ko sa balay gikan nitindak.

Ang among grupo nangadto na og Barili, Balamban, Asturias, Bohol ug uban pa. Kanang lapas na tag 100 kilometers ang sikaron. Apan klaruhon nako, wan a ko makakuyog ani nila tungod kay naundang ko og sikad og lagyo. Kada adlaw

Kaniadtong nagsugod ko, labing minos kaupat sa usa ka semana kong gatindak. Kon dunay medyo layo nga biyahe, mosaka ko sa Busay ug Buak sa Malobog o kon di man gani, sa Mabini ug Guba. Gikinahanglan nga andam ang mga tuhod ug baga sa mas kutas nga rota sa matag Dominggo.

Mas grabe ang first few months nako sa bike kay kada adlaw kong nagsikad aron makabisita sa lubong ni Maryheart aron matambalan ang kamingaw. Dako to og natabang nako sa pagkombate sa depression ug sa akong endurance samtang nagkadugay.

Gawas nga napiog nako ang depression, nius-us ko og 15 pounds nga wa mag-usab sa akong diet. Kon nag-maintain ko og saktong diet, basin akong nakuha ang 147 pounds nga maoy akong ideal wait unta nako.

Usahay gani grabe ang akong mapaslak sa tiyan kay basta mosikad, ang imong lawas mo-burn og calories nga mopasamot sa imong cravings sa pagkaon. Road rage Nakahisgot na ko kaniadto kabahin aning road rage kun kanang away sa mga motorista sa karsada. Daghan ni nga mga hitabo dinhi sa atoa.

Kini nga hitabo sa karsada nikutlo og kinabuhi niadtong Hulyo 25. Gipusil patay sa army reservist nga si Von Tanto ang siklista nga si Mark Vincent Garalde human sila magsukmagay tungod sa away sa trapiko.

Nadakpan na si Tanto didto sa among lalawigan sa Masbate diin siya nitago. Sa mga hulagway nga nanggawas sa media, nabun-og si Tanto kay dunay blackeye.

Kon imong pasumban ang kainit sa ulo diha sa karsada, duna gyuy dautang mahitabo, labina kon usa ini init og ulo ug armado, sama kang Tanto.

Bisan ako, tagsa rang adlaw nga di ko makahibag og sipat nga driver sa karsada. Usahay mabadlungan nako. Apan di nako tubayan kon masuko.

Lisod na kon pasundan ang kainit sa ulo, duna gyuy dautan nga sangputan.