I live for your love
DUGAY kong gitutokan si Ador. Kalit siyang miseryuso. “Motuo diay kag karma, Dor?” “Tuo molang. Bisag ingon ko ani, nagduwa-duwa sa gugma sa mga girls, pero Lay Minister god si Papa sa simbahan, ug si Mama sab sakop og laing kapunongan sa simbahan.”
“Unya nganong ingon ka man aning pagka anak, Ador? Wa mosunod sa maayong mga pagtulun-an sa simbahan?”
“Wa baya magkuwang og tambag ang akong parents nako, Loreen. Ingon gyud tingali ko ani. Mahiligon gyud og mga girls. Dako man kunong sa’a ang akong gibuhat, ingon nila ni Mama ug Papa. Mao nga motuo kog gaba.” “Wa ka mahadlok kon moabot na ni nimo?” Gusto nakong sutaon kon unsa kamatinud-anon si Ador sa iyang pagtuo. “Nahadlok, uy. Motuo man kog Diyos.” “Aw, mao man kaha. Pagbinuotan na. Pagpilig usa sa imong mga uyab ron ug siya na lang ang mahala.”
“Gibuhat ko na kana, uy, Loreen. Gusto na kong mag-usab. Pero naglisod man ko sa paghimo ani. Mopatigbabaw gyud nako ang pagkaibugon kog babaye. Aw, kon di pa lang ko nila sugton, di unta ko mag-ilis-ilis og uyab.”
“Lisod man kana, Ador. Gisugot ka kay love ka nila. Aw, namo diay. For example, nako lang. Gisugot tika kay na- in-love man gyud ko nimo. Aw, mapugngan man nang imong pagkoleksyon og mga uyab kon di ka mangulitawo. Kinsa man say babaye nga mosugot nimo kon di nimo pangulitawhan?”
“Mao sab nay akong pagtuo, Loreen. Pero di man gyud ko makapugong sa akong kaugalingon, uy. Kon duna koy babaye nga maibgan, pangulitawhan man gyud nako.”
“So, magpabilin ka lang gyud diay nga ingon ana hangtod sa imong pagka tiguwang? Na, kini ra bang tawo nga pilian kaayo, adto gyud mapunta sa pinilian.” “Simbako uroy!” Dako kaayog katawa si Ador. Unya iyang gikuptan ang akong kamot. Nakahuman na mig pangaon og ice cream.
“Ayaw kog basola, ha, Loreen, kon makigbuwag na ko nimo? Kuan man gud, may nang mentras di pa kaayo dugay ning atong relasyon, likayan na ko nimo. Masakitan ka lang gyud lagi. Paraygon ra ba kaayo si Sofia nako. Game kaayo siya, uy.” “I know. Parehas man mo.” Mikatawa ko. Mipahiyom lang si Ador. Unya nanggawas na mi sa snack bar. Pagka ugma, kay vacant period man nako nianang ten in the morning, nag-esnak ko sa canteen. Misulod si Sofia sa canteen. Malipayon kaayo siya nga miduol nako.