DILI MAG-CURRY
SA paghiabot nila ni Dwyane Wade ug Rajon Rondo sa Chicago Bulls, mikalit kalig-on ang backcourt nga posisyon sa 6-time Na tional Basketball Association (NBA) champions.
Ikatambayayong nila ni Wade ug Rondo si Jimmy Butler sa pagtapak sa haw-ang nga nabiyaan sa kanhi MVP nga si Derrick Rose, kinsa mibalhin sa New York Knicks.
Ning panahuna, daw gikinahanglan nga ang mga guwardiya pulos mangitsahay sa three-point land ug dili lang magsalig sa pagpasa sa bola. Mao kini ang gipauso sa Splash Brothers sa Golden State Warriors nga sila si Stephen Curry ug Klay Thompson.
Apan giklaro ni Wade nga dili sila mosunod sa Splash Brothers gumikan kay aduna sila’y kaugalingon ug lahi nga puwersa ug kusog nga ikabuga.
“We have our own strengths, and with those strengths is what we’re going to bring to this game,” matod ni Wade sa usa ka press conference kagahapon diin opisyal nang gipaila ang kanhi pambato sa Miami Heat isip sakop sa Bulls.
“We’re not going to come out there and try to be Stephen Curry. That’s not our game,” dugang ni Wade.
Nagkanayon si Wade nga mismong si Butler ang mitawag kaniya atol sa free agency ug miawhag kaniya nga moduwa sa Bulls.
“We’re not going to go through this all year. It’s Jimmy Butler’s team,” asoy ni Wade. “Myself and Rondo are here to bring what we bring as athletes to this team and to this city.”
Kon pinuntosay lang ang hisgutan, dili kini problema ni Wade ug kaya niyang modilaab sa opensa bisan wala siya maila nga usa ka lehitimong three-pointer.
Ang 6’4” nga magduduwa nagaverage og 19 puntos sulod sa 74 ka mga duwa sa miaging season.
Si Wade, kinsa nakabaton og mga titulo sa Heat niadtong 2006, 2012, ug 2013, mitataw nga iya gyung desisyon nga moduwa sa Chicago nga maoy lugar nga iyang natawhan.
“I had a contract offer in Miami that I could have took. I decided not to take it,” pasabot ni Wade. “It was my decision to be selfish and to live out a dream of mine. I brought a lot of excitement to Miami and it’s a home to me. It will always be. I want to bring a little bit here to Chicago while I have a little bit left.”
Si Wade, kinsa natawo sa Chicago, Illinois, mitataw nga nagpanikad na siyang moduwa alang sa iyang mga katagilungsod.
“My dream of becoming an NBA player started here, started here in my hometown,” batbat ni Wade. “I know it took a long time to get here, but I am here and I’m excited to be here.”