PORLON GAMIT SA TOKHANG
San Nicolas Police Station nanghadlok sa rekorida Suba
PORLON ang gigamit sa mga pulis sa San Nicolas Police Station sa Cebu City Police Office sa ilang gihimong Oplan Tokhang sa barangay Suba, Dakbayan sa Sugbo.
Kini aron ipahibawo sa drug personalities nga kon di pa motahan sa ilang kaugalingon, mahimong sa sunod nga mga adlaw mosakay sila niini.
Gikantahan usab sila sa CCPO Choir diin ang lyrics niini naghulagway sa sitwasyon karon nga si President Rodrigo Duterte na ang namuno nga daghan na ang napatay tungod sa pagpadayon sa illegal nga kalihukan.
Matod ni Chief Insp. Keith Andaya, hepe sa Station 6, nga ilang gituyo ang pagdala og porlon aron ipakita sa mga durugista sa maong lugar nga mahimong delikado ang ilang kinabuhi kon magpadayon sa ilang illegal nga bisyo.
“Naa tay porlon aron atong ipakita sa katawhan nga ang illegal nga drugas, dili makaayo sa atung kalawasan. It’s either paingon sila sa porlon or adto sa patrol car,” matod ni Andaya.
Kapin na sa 200 ka drug personalities ang ningtahan sa police station nga misanong sa Oplan Tokhang apan duna pay daghan nga nagpabilin pang nagtago ug nagpadayon sa illegal nga negusyo.
Si Supt. Cheryl Boniao, hepe sa Police Community Relations sa CCPO, nagkanayon nga ang mensahe sa ilang awit ngadto sa katawhan nga ihunong na ang pagpamaligya sa illegal nga drugas sanglit makadaot sa kaugmaon sa kabataan.
Daghan ang nalingaw nga mga lumolupyo sa barangay Suba human makadungog sa kanta sa CCPO nga nag awhag nga moundang na sa bisyo nga shabu.
Si Edna, taga Barangay Suba, nitug-an sa
Superbalita Cebu nga daghan pa gihapon ang nagpadayon sa ilang bisyo sanglit aduna pay namaligya sa ilang lugar.
Apan nagtuo siya nga ning gibuhat sa Station 6 diin migamit sila og porlon, daghan na ang moundang sa pagpamaligya sa illegal nga drugas.
“Daghan pa kaayo diri sa amoa. Naminaw ra na sila sa kilidkilid pero maayo ning ilang gibuhat sa mga pulis o kay nagdala gyud og porlon,” matod ni Edna.
P3 MILLION
Samtang uyon ang hepe sa Police Regional Office 7 sa tinguha ni Duterte nga hatagan niya og P3 milyon kon kinsa ang makapatay og pulis nga protector sa bigtime drug lord.
Matod ni Chief Supt. Noli Taliño nga dako ni og matabang sa paghunong sa illegal nga kalihukan sa mga pulis nga nalambigit sa illegal nga drugas.
Hinuon matod pa niya nga wala siyay nadunggan nga dunay mga pulis dinhi sa Central Visayas nga protector sa mga bigtime drug lord gawas lang sa pagpanawat og payola gikan niini nga gitawag niya nga ninja cops.
Apan daghan nga mga pulis ug kanhi police nga nalambigit sa pagpamaligya. Makapamatuod niini kadtong pulis sa dakbayan sa Naga nga naengkwentro sa mga sakop sa Regional Special Operations Group (RSOG) 7 niadtong mi_ aging buwan.