Kauban sa pulis nga 'nangulata' nailhan
IPATANGTANG sa serbisyo ang pulis sa dakbayan sa Mandaue nga nag viral sa Facebook tungod sa pagpanapat sa usa ka driver sa miaging semana sa barangay Looc, dakbayan sa Mandaue.
Padayon pa nga gipangita sa Mandaue City Police Office si PO3 Renato Inot human wa na mobalik og duty sa City Intelligence Branch sa MCPO samtang ang iyang kauban nailhan na ug nasayran nga iya kining ig-agaw.
Ang MCPO mimando na pagparelibo kang Inot sa CIB ug gipatahan na usab ang armas niini samtang magpadayon ang imbestigasyon.
Ang pangulo sa kapulisan sa Central Visayas, Chief Supt. Noli Taliño, nimando usab sa kapulisan sa Mandaue nga pasakaan og kasong absent without official leave si Inot human nagpadayon sa iyang pagtago-tago.
Nailhan na usab nila ang lalake nga naka t-shirt og orange nga nag bitbit og armas nga si Adelcos Alonzo, 45, taga sitio Sea Breeze, Barangay Mactan sa Lapu-lapu City.
Matod ni Taliño nga papasakaan niya og kasong illegal possesion of firearms si Alonzo.
Nitan-aw si Taliño sa video nga gi upload sa usa ka nitizen ug nakasaway siya sa gipakitang batasan sa pulis nga iyang gihulagway nga bastos.
Nasagmuyo siya sa gihimo ni Inot sanglit nakakibhang kini sa pagsalig sa katawhan sa kapulisan ilabi na karon nga mihimo sila og kampanya pagbatok sa illegal nga drugas.
“Talagang un-becoming yung actuation nung pulis, di dapat yung ganun ang actuation ng pulis. Kaya sabi ko duon sa city director, siguraduhin na ma-file-an ng kaso,” matod ni Taliño.
Ang MCPO nag umol na og trackers team nga maoy mangita kang Inot aron ipa report sa hepe apan mibahad si General Taliño nga kon mosukol, di magduha-duha ang iyang mga sakop sa pagpusil.
Sa dihang nahinabi sa mga tigbalita kagahapon, gibutyag ni PSSupt. Roberto Alanas, hepe sa Mandaue City Police Office (MCPO) nga si Inot ug Alonso padayon pang gipangita sa kapulisan human nagmagahi sa pagtahan sa iyang buhatan.
Si Alanas nagkanayon nga ilang nahibaw-an ang pagkatawo ni Alonso sa ilang mga follow-up operation ug pabisita sa balay ni Inot sa dakbayan sa Lapu- Lapu kon atua ba kini didto.
Gitataw ni Alanas nga niadtong Dominggo gikatahong motahan si Inot kaniya apan wa mopatim-aw atol ning pagsuwat.
Matod ni Alanas nga human sa insidente, wa na mopauli pa sa balay si Inot uban ni Alonso base sa pakisusi sa iyang mga kawani nga nibisita sa gipuy -an sa mga suspek.
Nakadawat usab og taho si Alanas nga atua sa lungsod sa Medellin ang duha maong gipadad-an dayon niyag tawo didto.
“Pumunta na sila dito sa Police station. Show up. Sagutin nila ang reklamo sa kanila at ipaliwanag na nila ang kanilang side kasi magandang marinig ang kanilang side,” pahimangno ni Alanas kanila ni Inot ug Alonso.