Mga cell phone nasakmit sa CPDRC
MGA sakop sa Provincial Public Safety Company nitabang na karon sa pagbantay sulod sa Cebu Provincial Detention and Rehabilitation Center (CPDRC).
Daghang cellphone nakuha na usab gikan sa mga inmate nga nagtinir niini sulod sa bilangguan.
Lakip sa nakuhaan og laing cellphone ang babayeng inmate nga una nang gitumbok nga cyberporn queen sa Sugbo.
Huwebes sa miaging semana, ni- report na sa CPDRC ang 18 ka mga sakop sa PPSC nga magshifting sa ilang duty.
Si Gobernador Hilario Davide III unang nangayo og police assistance gikan sa Cebu Provincial Police Office aron makatabang sa pagbantay ug pagpatunhay sa kahapsay ug kalinaw sa provincial jail.
Sa ilang pag-istar sa prisuhan, nakasakmit dayon ang mga pulis og daghang cellphone.
Di hinuon atol sa greyhound operation kundi atol nga nag-roving sila dihang ilang nasakpan ang pipila ka inmates nga yano lang nigamit niini sulod sa bilangguan.
Si Provincial Security Officer, Bobby Legaspi, kinsa maoy gitugyanan ni Davide sa pagtan-aw sa inadlaw nga operasyon sa CPDRC, niingon nga dakog tabang ang presensiya sa kapulisan sulod sa provincial jail.
Matod niya, sila maoy mobantay sa mga kontrabando nga posibleng ipalusot paingon sa sulod o dalhon sa gawas sa prisohan.
Si Legaspi nibahad alang sa pagpahigayon og dugang greyhound operation sulod CPDRC tungod sa mga kontrabando nga posibleng anaa gihapon sa sulod.
Wa hinuon niya itugan kon kanus-a kini.
Ang babayeng inmate nga si Eileen Ontong, kinsa nag-atubang og kasong may kalambigitan sa cyber pornography nakuhaan na usab ug laing cellphone kagahapon.
Si Ontong una nang nakuhaan og cellphone sayo karong buwana, human usab gi- raid ang iyang selda tungod sa impormasyon nga nagpadayon siya sa iyang patigayon sa cyber sex.
Sa Septiyembre, gitumbok ni Legaspi nga ibalik na ang pagpanawat og bisita o dalaw diha sa CPDRC.
Hinuon giklaro niya nga dili na mahimong maka- overnight ang mga bisita, sukwahi sa gipatuman sa mga kanhi tagdumala sa bilangguan.
Ang conjugal visitation gitun-an nga i-limit lang sa usa o duha ka oras ug di na mahimo ang overnight.