Frasco midawat sa tanyag
GIDAWAT na ni Liloan Vice Mayor Vincent “Duke” Frasco ang nominasyon ni Presidente Rodrigo Duterte nga nagtanyag kaniya nga commissioner sa Cebu Ports Authority (CPA).
Siya nibutyag nga pormal niya nadawat ang nominasyon gikan sa Office of the President, buhatan sa executive secretary ug sa Presidential Assistant for the Visayas.
Nahuman na usab og interview sa Governance Commission for Government-Owned and Controlled Corporations ang bise mayor ug naghuwat na lang kini sa kompirmasyon gikan sa Presidente.
Kon itudlo ni Duterte si Duke isip commissioner sa CPA, ang kapartido ug numero uno nga konsehal sa Liloan nga si manlalaban Thelma Jordan, ang mopuli sa mabakantehan nga puwesto isip bise mayor ug presiding officer sa konseho.
Samtang sabutan sa ilang partido kon kinsa ang ihulip kang Jordan isip konsehal.
“Because ang ma-pull up is from our party since the party has the privilege to nominate,” sumala ni Duke. Ang iyang asawa nga si manlalaban Christina Garcia-Frasco, ang mayor sa lungsod.
Kinahanglan nga moluwat siya sa iyang position pagka bise mayor sa Liloan tungod sa balaod nga nagdili niya sa paghupot og duha ka puwesto, isip elective official ug appointive official sa presidente.
Si Duke nagtuo nga dako siya og matampo sa CPA gumikan sa iyang kasinatian isip kanhi mayor sa Liloan sud sa pipila ka tuig, labi na ang Sugbo dunay usa sa labing dako nga pantalan sa Pilipinas.
Matod niya moabot sa P1 bilyon ang income sa CPA diin 30 porsiyento niini kay net na.
Si Duke niasoy nga base sa konsultasyon nga iyang gihimo sa mga barangay kapitan ug katawhan sa lungsod, uyon sila nga dawaton niya ang nominasyon sa presidente isip commissioner sa CPA.
“Basta lang kuno kon mo- text sila mangimbitar sila sa pista, naa lang gihapon ko,” pamulong sa bise mayor uban sa pagkatawa.
Ubos sa iyang pagdumala sa Liloan, nahimo nga 1st class ang lungsod gikan sa 3rd class ug nakadawat kini og daghang pasidungog isip top performing local government unit sa lalawigan sa Sugbo.
Napili usab siya nga usa sa mga Outstanding Young Men (TOYM) of the Philippines for public administration.