Pagprinta og balota gihunong

TEMPORARYONG gihunong sa Commission on Elections (Comelec) ang ilang pag-imprinta sa mga balota alang sa barangay ug Sangguniang Kabataan elections karong Oktubre.

Kini human nianunsyo si Presidente Rodrigo Duterte nga iyang suportahan ang tinguha sa pag-oktaba sa umaabot nga piniliay sa barangay gumikan sa kabalaka nga gamiton sa mga magpapili sa barangay ang kwarta nga halin sa ginadiling drugas.

Hinuon, gipadayag ni Atty. Genevieve Guevarra , pangulo sa Comelec Printing Committee, nga kon wala pay balaod nga mapasar o joint resolution sa lower ug upper house hangtod Setyembre 1, ilang ipadayon ang pag-imprinta sa balota.

Ang Comelec nisugod sa pag-imprinta sa mga balota niadtong Agusto 21 para sa barangay election samtang karong Septiyembre 1 ilang sugdan ang pag-imprinta para sa SK election.

Ang matag balota nga iprinta sa Comelec nagbalor og P3.80 base sa National Printing Office diin kinahanglan silang mo-imprinta og 85 milyones ka balota nga gibanabanang mokantidad og P255 milyones sa kinatibuk-an.

Si Atty. Marchel Sarno, election officer sa Comelec north district sa siyudad sa Sugbo, niingon nga magpadayon ang ilang preparasyon sa piniliay.

“Ang importante diha nga madayon ug sa dili ang eleksyon preparado ta,” paghulagway sa election officer.

LAINLAING REAKSIYON

Si Konsehal Jerry Guardo, sakop sa Team Rama ug Sisinio Andales sa BOPK, pabor nga ipadayon ang election.

“Ang katarungan nila taphaw kaayo duha na lang ka buwan ang paabuton ato,” matod ni Andales.

“pabor ko nga ipadayon ang election,” padayag ni Guardo.

Si Kapitan Ramil Ayuman sa barangay Apas ug vice president sa Association of Barangay Council sa Cebu City pabor sa pag-uswag sunod tuig.

“Kami nga incumbent malipay (kon madayon).”