Langyaw napalgan nga patay

NAPALGAN nga patay ang usa ka langyaw nga wa na igkita sud sa tulo ka mga adlaw sa iyang mga higala.

Nadiskubrehan siya pasado alas 11 sa udto niadtong Dominggo sulod sa iyang unit sa condominium sa dalan Escario, dakbayan sa Sugbo.

Ang namatay mao si Bryan Richard Bate, 76, usa ka psychologist, taga Ohio, USA.

Unang nakadiskubre kaniya ang iyang suod nga higala sila si Nicholas Lajona ug higala nga langyaw nga si ‘ Jackson uban sa roomboy nga si Monching Generalao.

Matod ni PO3 Enrico Quirante sa Homicide Section sa Cebu City Police Office nga nahibulong si Lajona nga wa na niya makontak sa cellphone si Bate human sila katapusan nga nagkita niadtong Martes sa gabii, gikan nga nanihapon.

Gisusi ni Lajona si Bate sud sa condominium ug nangayo og tabang gikan sa mga kawani sa condo.

Gisuwayan siya pagtawag sulod sa iyang lawak. Wa na usab siya makita sa taga condo nga migawas sa lawak.

Sa dihang gi-ablihan ang lawak, nag-on ang aircon ug nakita si Bate nga nagtakilid sa paghigda ibabaw sa iyang kama.

Dugang nasayran gikan ni Lajona nga nireklamo si Bate nga maglisud usahay sa pagginhawa. Way nakitang timailhan sa foul play.