Mga motorista sa Talisay ipangkiha na sa CT-TODA?
ANDAM nang ipasaka ang kaso batok sa mga motorista nga nadakpan sa dakbayan sa Talisay nga naisyuhan og citation ticket apan, wala magtagad ang mga nasikop.
Una niini, nibahad ang bag-ong pangulo City of Talisay Traffic Operation Development Authority (CTTODA) retired Gen. Hiram Benatiro nga ilang ikiha ang mga nadakpan sa nagkadaiyang traffic violation sa Talisay nga naisyuhan og citation.
Gibutyag ni Benatiro nga naandam na ang mga affidavit alang sa kaso nga ilang ipasaka, diin siya mismo maoy nangunay sa paghimog affidavit.
Hinuon, wa makatino si Benatiro kon pila ka buok ang ilang ikiha tungod kay nagtipun-og sa ilang buhatan ang mga citation ticket, diin ang mga nasikop wa magtagad.
Matod ni Benatiro nga mas maayong patagmon ang mga motorista tungod kay magsalig nga citation ra ang gi-isyu sa mga manakopay di ra mahadlok ug magtagad.
Nagkanayon siya nga lahi ra og ang iisyu sa ilang mga enforcer mao ang Temporary Operators Permit nga gikan sa Land Transportation Office tungod kay ang mga drayber mahadlok.
Nagtuo si Benatiro nga tungod unya niini, daghan na ang mohangyo sa iyang buhatan ug moduol sa mga politiko aron magpatabang. Apan matod niya nga ang hinungdan nganong siya maoy gipili nga mangulo sa CT-TODA tungod kay di politiko ug di magpanagana sa pagdesisyon bisan og ang madakpan lider o ba kaha supporter.
Midugang si Benatiro, ang kaso ipasaka sa piskaliya bisan unsang adlawa sulod ning semanaha aron pagpugos sa pagbayad sa citation.