Ordinansa batok refilled butane canister

ORDINANSA sa dakbayan sa Lapu-Lapu nga nag- ban sa pagpamaligya og refilled butane canister hingpit nang ipatuman karong Septiyembre.

Gitahasan na ang mga barangay kapitan sa pagpahibawo niadtong mga nag- produce, baligya, gamit sa refilled butane canisters nga nagsilbing pahimangno kanila sa dili pa hingpit ikapatuman ang pagpahamtang og silot.

“I-list down na nila ( barangay opisyal) kadtong mga refilling station, namaligya apil na kadtong nag- transport, aron ma-forewarn sila,” tipik sa pamahayag ni Mayor Paz Radaza.

Human sa maong pahimangno sulod sa duha ka semana, sugdan na ang implementasyon diin ang kapulisan maoy mangulo sa operasyon.

“Kon ang Siyudad maoy makadakop, makamulta og P5,000 but kon ang taga-Department of Energy (DOE) P6,000 ang fine,” pahibawo ni Radaza.

Ang presidente sa Association of Barangay Council (ABC) Jose Dungog nagkanayon nga wa na siya motugot nga moisyu og barangay clearance niadtong LPG retail stores sanglit adunay pipila ang hilom nga morefill og butane canisters.

Si SF04 Diomed Alburo, chief administrator sa Lapu-Lapu City Fire Central District nibutyag nga ang ordinansa nagtugot sa traffic enforcers ug pulis nga makapanakop niadtong sakyanan nga nag- transport og refilled butane canisters.

Sa madakpan makamulta og P3,000 sa first offense lakip na ang pagimpound sa sakyanan nga gigamit sa pag- deliver.

Sa kadtong namaligya nga way business permits, makamulta og P5,000.

Ang maong ordinansa nga giaprobahan niadtong Abril nga gipangamahanan ni kanhi konsehal Alexander Gestopa Jr. nakakita sa dakong panginahanglan sa regulasyon sanglit mao kiniy nag-una nga hinungdan sa sunog.

Wa kini mapatuman gumikan kay naghinangat ang pinili-ay niadtong higayona.