Lalaki gipusil-patay sa Tanke, Talisay City

LALAKI gipusil-patay samtang nagkaon daplin sa karsada sa Sitio Rattan, Barangay Tanke, dakbayan sa Talisay kagahapon sa buntag.

Ang kapulisan sa Talisay miila sa biktima nga si Amasony Flores, alyas Sony, hingko, temporaryong nag-abang sa lugar, apan lumad nga taga Tungkil, lungsod sa Minglanilla.

Si PO2 Stephen Sefuesca sa Talisay City Police Station nibutyag nga pasado alas 6:00 sa buntag nikaon ang biktima.

Sa dihang kalit lang mitunga ang wala mailhing lalaki dayog pusil sa luyong bahin sa ulo gamit ang wa pa matinong kalibre sa armas.

Mao kini hinungdan sa pagkahagba ni Flores sa karsada. Ang biktima nakaangkon og duha ka mga samad pinusilan sa ulo.

Daling nisibat ang wala mailhing tawo samtang si Flores gidala sa Talisay City District Hospital apan nakabsan sa kinabuhi.

Gisalikway sa kapulisan ang pagtuo nga drugas maoy motibo sa krimen. Usa sa ilang gitan-aw nga angulo mao ang personal.

Sa imbestigasyon sa kapulisan, si Flores kanhi kawani sa Talisay District Hospital hinungdan nga anaa kini nag-abang sa lugar apan wa na sa trabaho.