Hanz Abella maoy sunod molayat?

POSIBLING sa dili madugay mahitabo ang re-alignment diha sa konsiho ning dakbayan sa Sugbo. Buot nakong ipasabot nga adunay mga sakop sa Team Rama nga mao ang majority karon sa konseho ang molayat o mobalhin ngadto sa Bando Osmeña Pundok Kauswagan (BOPK). Una nang mibiya si Konsehal Dave Tumulak sa Team Rama ug mideklarar sa iyang kaugalingon nga ‘independente’. Pero gitagna nang daan nga sa madugay ug madali, motapon na ngadto sa BOPK si Dave. Kanang rason ni Dave nga nahasulan na siya sa sobrang pamulitika sa konseho, iya ra kanang rason. Ang tinud-anay nga rason nga nadani siya sa taga BOPK nga mobalhin. Adunay mas lawom pa nga rason nganong milayat si Dave. Usa niini ang iyang kaugmaon sa pulitika ug ang employment sa iyang mga igsuon diha sa City Hall. Pero desisyon kana ni Dave busa angay nato siyang respituhan. Mas nahibawo siya sa iyang baruganan kay kanato.

Posibling sunod nga molayat mao si Hanz Abella. Matod sa atong tinubdan nga adunay negosasyon karon tali ni Abella ug ang lider sa BOPK nga kanhi laos nga pulitiko. Gani niadtong Sabado sa gabii adunay nakakita nila ni Tumulak ug Abella uban sa kanhi laos nga pulitiko nga nanihapon sa usa ka restaurant sa Mandaue City. Unsa may ilang gi-estoryahan? Aw, alangan man og nagrosaryo sila didto. Mao nang makaingon ko nga sa dili madugay, ang BOPK na ang modominar sa konseho. Ang sunod nga kombensihon nila mao sila si James Cuenco ug Gerry Guardo.

Kon kining maong mga konsehal maghuna-huna sa ilang kaugmaon sa pulitika, aw, adto gyud sila sa moabin sa kasamtangang administrasyon. Unsa may makuha nila ni Mike Rama nga sibilyan naman karon? Nagtuo kaha mo nga mosuporta pa nila financially si Mike? Unsa may ihatag nila sa ilang mga konstituwente sa natad sa proyekto kon dili sila hatagan og pundo sa administrasyon? Dominante tuod ang Team Rama sa konsiho pero ang ehekutibo o ang mayor man maoy mopagawas sa pundo. Ang mayor man maoy naghawid sa puntil. Aber?

Importante kaayo ang numero diha sa konseho kay kini maoy mosuporta sa legislative agenda sa mayor. Adunay mga proyekto ug programa ang mayor nga dili ma-implementar kon walay pagtugot sa konsiho. Sama anang pagbaligya sa South Road Properties (SRP). Mao nga mohimo og lakang ang mayor nga ang iyang mga kaalyado ang majority sa konseho. Biyaan na si Mike sa iyang mga sakop. Maghilak lang na si Mike sa tago. Ingna kog bakakon.