Epekto sa pamaagi ni Duterte
BISAN pa man tuod og dunay pipila ka mga sektor sa nasod nga wa makauyon niining pamaagi sa kampanya ni Presidente Rodrigo Duterte batok sa mga nalambigit sa gidiling drugas, apan nagdaghan usab ang pabor niini.
Kini maoy hinungdan nga pabilin nga hataas gihapon ang popularity rating sa presidente taliwala sa mga pagsaway gikan sa Commission on Human Rights, sa religious sector ug gani miintra na usab ang United Nations (UN).
Base sa natala sa Philipppine National Police (PNP) mokabat na ngadto sa 1,900 ang mga napatay nga may kalabutan sa gidiling drugas samtang aduna na usay 600,000 ang mga misurender nga mga pushers ug users.
Gituohan nga mosaka pa kini sa umaabot nga mga adlaw sanglit wa molugak ang presidente sa iyang madugoon nga kampanya batok sa illegal drugs.
Ang CHR mihulagway nga dakong kalapasan ang gihimo sa administrasyon ni Duterte niining iyang pagtugot sa extra-judicial ug vigilante killings.
Kini tungod kay gideritso na lang og pagpangtumba ang mga suspek nga wa hatagi og kahigayonan nga makapresentar sa ilang habig.
Laing gireklamo kining pagpangbutyag ni Duterte sa mga pangalan sa mga dagkong officials ug mga pulitiko sa nasod nga nagsilbing protektor sa mga drug lords.
Giingon nga dako kaayo kining salikwaot ubos ning maong pamunoan sanglit gideritso na lang sa pagpakaulaw ang mga anaa sa ilang listahan nga wala hatagi og due process.
Apan mas maayo sab siguro kon lantawon sa mga kritiko sa presidente kon unsa ka epektibo ang pamaagi niini nga nakapabungkag ug nakaparatol sa mga kriminal ug mga dagkong durugista sa nasod.