Tawo ni Toral ang OIC warden?

WALHON NA. Ang mga konsehal nga sakop sa Team Rama, way apil ni kanhi Cebu City Mayor Mike Rama, Kon. Jun Alcover ug Atty. Hanz Abella, mga walhon na. Walhon kay sa ilang paghurar ang wala nga kamot ang ilang giisa.

Niadtong Sabado sa gabii ang mga konsehal sa Team Rama, nga gipangulohan ni Bise Mayor Edgar Labella, mihurar atubangan ni Speaker Pantaleon Alvarez ngan nga bag-o nga mga sakop sa PDPLaban, ang partido ni Presidente Duterte.

Si Mandaue City Mayor Luigi Quisumbing ug ang iyang mga konsehal nga midagan ubos sa Liberal Party (LP) misakay usab sa PDP-Laban ni Presidente Duterte. Mihurar usab sila atubangan ni Speaker Alvarez niadtong Sabado sa gabii.

Apan ang mga opisyales sa Mandaue city dunay kalahian. Ang tulo ka konsehal nga midagan ubos sa One Cebu, nga kaalyado sa PDP-Laban sa miaging piliay, wa modungan og hurar sa grupo ni Mayor Quisumbing.

Si Kong. Jonas Cortes mobalhin kaha ngadto sa PDPLaban? Si Kongresista Cortes sakop sa Liberal Party (LP). Midagan siya ubos sa LP pagka mayor sa Mandaue city ug sa iyang pagdagan pagka kongresista sa miaging piliay diin iyang kauban si Mayor Quisumbing sa LP.

Pagdagan ni Presidente Duterte wala siyay kandidato sa PDP-Laban dinhi sa dakbayan sa Sugbo. Si kanhi Mayor Rama ug ang iyang pundok Team Rama kaalyado ni kanhi Bise Pres. Jejomar Binay, ang kandidato pagka presidente sa UNA. Si Mayor Tomas Osmeña ang iyang kandidato pagka presidente mao si Mar Roxas, nga LP.

Apan sa pagdaug ni Duterte nga presidente, ang nag-una og layat ngadto sa PDP-Laban mao ang mga kongresista nga kadaghanan mga LP. Karon, ang mga lokal nga opisyales dinhi sa Cebu apil na ang mga dakbayan misakay na sa PDP-Laban.

Natural nga ang nasudnon nga kagamhanan malipay nga ang mga lokal nga opisyales mouban sa administrasyon aron dunay kauyonan sa gusto nga ipatuman sa nasyonal nga pangagamhanan sama sa plano ni Duterte nga mag-Federalismo ang atong nasud.

Morag naunhan si Mayor Tomas sa Team Rama sa pagsakay sa PDP-Laban. Pero sa akong tan-aw si Mayor Tomas di mouban sa PDP-Laban kay sa miaging piliay wa man siya personal nga misuporta ni Duterte. Sa mubong sulti, si Mayor Tomas dunay baruganan.

Gani, kon atong mahinumduman nga sa nanglabay nga piliay miingon si Tomas nga wa siya magkinahanglan og partido-nasyonal alang sa iyang kandidatora. Alang kaniya ligon ang iyang Bando Osmeña Pundok Kausawagan (BOPK).

**** WARDEN. Unsa kahay dakong negosyo diha sa Cebu Provincial Detention and Rehabilitation Center (CPDRC) nga di man biyaan sa mga nangagi nga nagduma aning prisohan sa probinsya?

Nakapangutana ko kay suma sa akong nahibaw-an gikan sa usa ka kasaligan nga tinubdan, ang bag-o nga gitudlo ni Gob. Junjun Davide nga OIC warden usa ka Bobby Legaspi, nga matud pa Amboy kun FilAm. Si Legaspi, matud pa, bata-bata ni kaniadto CPDRC consultant Marco Toral.

Si Marco Toral miundang ngan nga consultant ni Gobernador Davide sa CPDRC sa isyu nga dunay piniriso nga nakalayas. Ang CPRDC gipanghambog kaniadto nga usa ka segurado nga prisohan. Gawas, niini dunay lain nga mga isyu batok kaniya.

Atong mahinumduman nga sa pagronda sa selda sa CPRDC daghan nga celphone ug mga laptop ang nakuha gikan sa mga detinado nga unta kini nga mga butang gidili nga makahupot ang mga piniriso. Sa ato pa, dinhi ra sa ato nga hi-tech ang mga piniriso. Onli in da Pilipins!

Duna koy nadawat nga estorya usab nga kining si Legaspi, usa ka dakong tawo, morag bouncer sa nightclub og batasan kay manghadlok sa iyang kauban sa buhat diha sa Kapitolyo.

Wa man tingale magkinahanglan og berdugo ang CPDRC. Ang kinahanglan diha ang tawo nga makamao mopadagan sa prisohan ug strikto moimplementar sa regulasyon ug balaod niini.

Oi, angayan nga tan-awon og balik ni Gobernador Davide ang iyang gitudlo diha sa CPDRC kay siya unya ang mabuthan. Kahibawo ko ug ang akong mga suod nga higala nga but-an nga tawo ang gobernador. Apan lagi ang nagpalibot kaniya, pwera sa maayo, dunay mga personal nga agenda.