`Camp Sawi’ hubogay ang show
IN fairness, alegre ang Camp Sawi. Ubayubay sad ang nanan-aw pagtan-aw nako sa SM Cinema.
Daghang makalingaw nga scene apan ang gikataw-an nako pag-ayo ug hasta ang mga nanan-aw kadtong nahubog silang Arci Muñoz ug Bela Padilla ug sigeg bahakhak daplin sa baybayon.
Natural kaayo ang ilang acting hangtod nga napunta ang ilang topic sa ilang crush, ang camp master nga si Sam Milby nga ilang gitabangan og hubo sulod sa cottage.
Tinuod gyud diay kuno to silang nangahubog mao nga wa na silay paki sa ilang gipangyawit ug gipanghimo.
Pero positibo ang dating niini sa mga nanan-aw.
ARCI PALAHUBOG
Nindot ang view sa isla sa Bantayan kay dinhi man ni sa Sugbo gi- shoot ang maong pelikula.
As expected, sold sa audience ang karakter ni Arci Munoz isip rakistang palahubog. Dunay similarity ang iyang role sa pelikulang Always be my Maybe” nila ni Gerald Anderson.
Si Arci na- brokenhearted human siya gibuwagan sa iyang kabanda ug boyfie (Rico Blanco) pinaagi sa breakup song.
Samtang si Bela Padilla sawi sa pagibig tungod kay naminyo sa lain ang iyang boyfriend for 10 years (Dennis Trillo) tungod lang kay dili siya Chinese.
BIDA ANG BELA
Si Andi Eigenmann, sa laing bahin, kabit sa edaran nga doktor (Tonton Gutierrez) samtang si Yassi Pressman iyang nadiskubre nga bading diay ang iyang uyab (Bret Jackson). Apan nawala si Yassi sa ending kay mao na tingali to pag-apil niya sa PBB.
Ang kinamub-an og exposure dinhi si Kim Molina nga kanunay gaitom og sinina. Ang iyang boyfriend (Alex Medina) naligsan ug namatay pila ka gutlo human ni- proposed niya.
Nilang lima, si Bela ang pinakadaghan og exposure nga maorag bida ang dating. Di sad hinuon ikahibong kay iya man ning idea ang estorya sa Camp Sawi ug ang iyang real-life boyfriend (Neil Arce) ang co-producer sa maong lilas. That’s why!
KATHNIEL, JADINE
Duha na lang katulog mosud na sad ang buwan sa “ber.” Nanimaho nang bonus para ibayad sa mga utang. Meri Krismas in advance. Kadali natong matiguwang aning kalakiha. Haha…
Unsay mapaabot nato sa September? Naa silang Kathryn Bernardo ug Daniel Padilla alang sa mall tour sa ilang pelikulang “Barcelona” sa Star Cinema. Duha ka mall shows ang ilang himuon sa SM City Cebu ug SM Seaside City karong September 12, Lunes.
Silang James Reid ug Nadine Lustre magconcert sad karong Sept. 17, Sabado sa Grand Ballroom sa Waterfront Cebu City Hotel isip tipik sa ilang Philippine Tour nga gitawag og “Jadine Love.”
PAK GANERN!
Lahi ra gyud kon naa si Vice Ganda sa It’s Showtime.
Sa miaging semana, wala si Vice puwerteng ugaha sa ilang programa. Dapat magbutang sila og dugang bading nga host nga pareho og kalidad ni Vice. Aron kon wala si Vice naay makapuli.
Bisan gani si Jhong Hilario niadtong Huwebes wala ganahi sa drama-drama nilang Vhong Navarro ug Anne Curtis sa Tawag ng Tanghalan mao to iyang gibagtingan kay dili kuno makalingaw ilang drama.
Kauban na nila mismong co-host ang nisulti ha!
Sa pagkawala ni Vice hasta ilang “pak ganern” nakalimtan.