Di mosustento kay way trabaho

Dear Atty. Joan,

Ang amahan sa akong anak mi-resign sa iyang trabaho dihang ako gipapun-an og P2,000 ang tag-P3,000 niya nga binulan nga sustento sa among anak. Karon dili na siya mohatag bisag usa ka dako kay wala na kuno siyay trabaho.

Ang akong nadunggan, nag-free lance kuno siya, apan mao lagi, Attorney, wa may payslip kay diretso man adto sa iya ang bayad so di na gyod ko kakolekta og para sa bata. Di mi kasado, apan iyang gi-recognize ang bata. Buot unta nakong ikiha siya Attorney. Unsay angay nakong buhaton? Salamat. Sandra

Dear Sandra,

Ang di-makataronganon nga paghikaw sa batakang panginahanglan alang sa pagpakabuhi sa bata (unreasonable deprivation of the child’s basic needs), pananglitan ang pagkaon ug mapuy-an, giila nga krimen ubos sa Seksyon 10(a) kalabot ngadto sa Seksyon 3(b) (3) sa R.A. 7610. Wala pa hinuoy nahukmang kaso ang Korte Suprema nga naghatag sa tataw nga interpretasyon ning maong probisyon sa balaod, apan mahimo gayod nga ilantugi nga ang pagbiya sa amahan sa imong anak gikan sa trabaho ug pag- freelance na lamang og trabaho nasulod ning maong probisyon. Tataw man nga ang katuyoan sa iyang pagbiya sa trabaho mao nga wala nay makita nga kinitaan niya, ug matago niya kini gikan kanimo.

Hinaot nakatabang kini kanimo. Atty. Joan