Suwerte si Reden

WA DAMHA ni Reden nga moabot sa ilang kabos nga panimalay si Don Martin, amahan ni Honey, ang labing adunahan sa Brgy. Bag-ong Silingan sa siyudad sa Lapu-Lapu. Daw di siya makatuo nga makataak sa ilang tugkaran ang amahan sa babayeng iyang gipakamutya. Labihan ka-estrikto si Don Martin ngadto nilang mga suluguon, labi na sa pakigsuod kang Honey, ang matahom niyang anak nga gitahod sa kalalakin-an sa ilang dapit. Nakagusto si Reden kang Honey nga nakagusto usab kaniya. Nagkasuod sila ug dihang gipadayag ni Reden ang tinuod niyang gibati sa dalaga, wala kini magpanuko pagtugyan sa iyang gugma kang Reden. Ang ilang relasyon nahibaw-an ni Don Martin.

Usa ka higayon kalit nga miduol si Don Martin kang Reden ug gisagpa og kusog. Nasarasay si Reden. Naisa ang mga kilay nilang Marlon ug Jomel nga mga kauban ni Reden nga mga suluguon sa Mansiyon,

“Di ka angayan nga masakop sa among pamilya! Kabos ka sama sa yuta nga angay tunob-tunoban! Pahawa dinhi karon dayon aron di tika mapatay!” Ingon sa nahugno ang kalibutan ni Reden niadtong tungora.

Mipauli si Reden sa ilang kabos nga panimalay sa tumang kahiubos. Si Marlon ug Jomel nahibilin sa mansiyon sa banayng Montenegro. Gibati silag kaluoy kang Reden kay buotan kini ug matinabangon. Di pa dugay ang hitabo dihang si Honey, anak nilang Don Martin ug Donya Rebecca, buot untang kidnapon sa tulo ka mga armadong tawo dihang nagpadung kining mo-eskuyla. Diha si Reden sa likod ni Honey isip badigard sa dalaga. Dihang gikuptan na ang bukton ni Honey niadtong yagpison og lawas kalit gipatiran kini ni Reden ug nahagba sa yuta. Miharong ang duha ka kauban niini kang Reden, apan wa sila magsilbi kay maayo man diay si Reden sa ‘martial arts.’ Kining hitaboa wa masayri ni Don Martin. Misamot ang pagkasuod nilang Reden ug Honey. Usa ka gabii nga si Don Martin ug Donya Rebecca may gitambungan nga ‘ party’ sa ilang higala, may nahitabo nilang Reden ug Honey sa lawak sa dalaga.

“Dong Reden, dia si Don Martin kuyog nilang Marlon ug Jomel!” matod ni Manang Rita, iyang inahan.

Gikulbaan si Reden sa kalit nga pag-abot ni Don Martin sa ilang kabos nga panimalay.

“Unsay tuyo ninyo nako, Senyor?” matod ni Reden. “Imo na sab kong sukmatan bahin ni Honey? Gilubong ko na siya sa kalimot, bisan milanat og taas nga panahon ang among relasyon. Wala ka nay angay kabalak-an!”

“Dili, Reden,” tubag ni Don Martin nga kalmado og tingog. “Nia ko kay si Honey tua sa ospital karon. Amo siyang gidala pagdala didto kay kalit siyang nalipong. Positibo nga nagsamkon siya ug mitug-an nga ikaw ang amahan sa iyang gisabak. Ugma sabutan nato ang inyong kasal sa labing dali nga panahon. Naghinam-hinam na kong makakita sa una namong apo ni Rebecca. Gisultihan sab ko nilang Marlon ug Jomel sa nahitabo didto sa eskuylahan di pa lang dugay. Salamat kaayo sa imong pagluwas kang Honey!”

Ingon sa dili makatuo si Reden sa gipamulong sa iyang agawon. Wa siya kahibawo kon tinuod ba gyud ang gipamulong niini. Apan nakita niya karon ang ka-seryuso sa nawong ni Don Martin nga kahilakon.

(KATAPUSAN)