Love is not blind
(Ikaupat sa pito ka mga gula)
NAKADESISYON ko nga pasagdan na lang gyud nako si Andrie sa pagpadayon sa iyang pagpangulitawo nako. Di sab mahitabo, uy, nga kon mahigugma ko, siya na ang maong lalaki. Usahay sulugsulugon ko sa akong mga amiga. “Sus, kaguwapo gyud sa imong uyab, uy, Marjory. He-he-he!” “Bitaw. Ikasuroy gyud sa Colon ang hitsura.” “Suwerte kaayo ka niya, uy, Marjory.” “Tse! Panghilom mo!” Sulingahan ko sila ug mahikatawa na lang ko. But I know they’re only kidding. Nakahibawo sila nga di mi bagay si Andrie sa usag usa. Guwapa ug nindot kog lawas, uy.
Unya miseryuso sila. Parehas silag gitambag nako. Kinahanglan kunong akong sugton si Mon aron mohunong na si Andrie sa pagpaninguha nako. Ug nianang pagka gabii, wa dayon ko makatulog. Nahunahuna ko ang giingon sa akong mga amiga.
Why not? Nakaingon ko sa akong kaugalingon. Husto man sab tuod. Kon boyfriend ko na si Mon, sure gyud ko nga di na maghasol si Andrie nako. Pero ang problema lagi, wa pa man ko mobatig gugma. Ug kon moabot man ang higayon nga mahigugma na kog lalaki, di sab ko makaseguro kon si Mon ba gyud. Who knows, there’s another man para nako.
Nakapanglingo ko. Ngano bang hasulon ko man ang akong hunahuna bahin sa gugma, uy? Unya na ko maghunahuna ani kon mopitik na ang akong kasingkasing sa paghigugma. Mipiyong ko kay gusto na kong matulog. Mingaw na ang sulod sa among balay, timailhan nga ako na lang tingali ang nagmata.
Usa ka adlaw nga nag- research ko sa library, mitupad paglingkod si Mon nako. Kalit ko niyang gihagkan sa aping. Sus, nabatyagan ko kaayo ang pagpamuwa sa akong nawong. Wa ko makalihok. Nakatan-aw kog dugay kang Mon nga nagpahiyom nako. First time pa kong nahagkan og lalaki since sa akong pagka dalaga. “O, uyab na ta, ha, Margs?” Ang kanahan, giyanu-yano lang ang pag-ingon nga magsweetheart na mi. Nagdali kong mitindog ug gibiyaan ko si Mon. Pero nagpanghikap ko sa akong aping nga gihagkan ni Mon. Morag gibati ko pa ang kainit sa iyang mga ngabil. “No!” Nagyawyaw ko. Nahibulong ko sa akong kaugalingon, kay kon magkita mi si Mon sa eskuwelahan, di ko makatan-aw og diretso niya. Morag mobati kog kauwaw. Mahunahuna dayon nako nga nahagkan na ko niya. Ug kon mag-inusara ko, si Mon ra ang akong mahunahuna. This is love? Makaingon ko sa akong kaugalingon?”
(SUMPAYAN)