Janitor kampyon sa U run
GIPATIGBABAWAN nila ni Azlan Pagay, kanhi Palarong Pambansa bronze medalist, ug ultra marathoner Preciosa Sanchez ang ilang tagsatagsa ka kategoriya sa 11th University Run nga nanukad ug nahuman sa Cebu Doctors’ University (CDU) campus sa Mandaue City niadtong Dominggo.
Naghari si Pagay sa men’s 25K division pinaagi sa oras 1:45:29, labaw og kapin sa upat ka mga minutos sa nagsunod kaniya nga si Ian Refuela, kinsa mioras og 1:49:45.
Nahimutang sa ikatulong dapit mao si Edilberto Datincila, kinsa adunay oras nga 1:54:05.
Si Pagay, 22, kinsa lumad nga taga Davao, midominar na sa lumba gikan pa lang sa sinugdanan. Sa interbyu sa Sun.Star Cebu, igsuong buhatan ning mantalaan, nagkanayon si Pagay nga kini maoy labing una niyang pag-apil sa lumba ug dako niyang kalipay nga nakuha niya ang kadaugan. Gipasabot ni Pagay nga wala siya nakapraktis sa miaging semana gumikan sa iyang trabaho isip janitor sa Cebu Normal University.
Si Pagay, kinsa bronze medalist sa 1,500- meter event sa 2012 Palarong Pambansa, nagsige og salmot og fun runs dinhi sa Sugbo sa milabayng tulo ka mga tuig.
Usa siya kanhi middle distance runner sa Crossing Bayabas National High School sa Davao Del Sur.
Sa iyang bahin, si Sanchez mipatigbabaw sa women’s 25K event pinaagi sa oras nga 2:15:08.
Nagsunod kang Sanchez mao sila si Rexel May Dalinog (2:38:20) ug Mae Cherryl Wuttke (2:49:46).
Sa 13K event, si Rendell Corro maoy mipadaog sa men’s samtang si Karla Cosep maoy milampos sa women’s.
Mingdaog sa men’s ug women’s divisions sa 6K mao sila si Andrew Sacris ug Kimi Wee. Sila si Japeth Iway ug Melinda Villar maoy ningpatigbabaw sa 3K event men’s ug women’s.
Sa 25K alumni catregory, sila si Cons Veloso (2:11:12) ug Checky Young (3:36:34) mao ang ningpatigbabaw.
Ninglampos sa women’s alumni 13K mao sila si Tarife Rolen (57.22) ug Abegail Alde (1:30.28) samtang sila si Cas Alzate (1:18:15) ug Jennifer Tapales (1:25:57) mao ang ningpatigbabaw sa 13K students.