Tres ni Tolomia mitabla sa duwa sa Gilas-RP, FEU
NAGPABUTO og three-point bomb si Mike Tolomia aron ilikay ang Gilas Pilipinas 5.0 sa kapildihan ug tablahon ang ilang duwa batok sa Far Eastern University (FEU) Tamaraws, 84-84, sa usa ka tune-up game niadtong Dominggo sa Gatorade Hoops Center sa Manila.
Wala’y ipahigayong overtime sa usa ka exhibition game.
Sa sayong bahin sa 4th quarter, ang Gilas nabiyaan og siyam ka mga puntos, 65-74, apan hinayhinay kining minggukod.
Sa nahabiling 18 segundos, nagpabiling naglabaw ang Tamaraws, 83-81.
Dako na unta ang kahigayunan sa Tamaraws nga maangkon ang kadaugan dihang nahatod sa freethrow line ang usa nila ka mga sakop nga si Raymar Jose.
Apan usa ra’y napasulod ni Jose sa iyang duha ka freethrows hinungdan nga nakahigayon pa si Tolomia sa pagtabla sa duwa.
Kini maoy ikaduhang tune-up game sa duha ka mga kampo.
Una silang nag-abot niadtong Miyerkules diin mingdaog ang Gilas, 84-77.