UC BATOK USC
Sacred Heart mosuway’g langkat sa solong liderato
ANGKUNON og suway sa Sacred Heart Schools-Ateneo de Cebu (SHS-AdC) Magis Eagles ang solong liderato sa high school division sa ilang pagpakigbatok sa Cebu Eastern College (CEC) Dragons sa premirong duwa karong hapon sa Cebu Schools Athletic Foundation Inc. (CESAFI) sa Cebu Coliseum.
Ang Magis Eagles, nga maoy defending champions, kasamtangang natanggong sa three-way tie sa 4-1 nga rekord kauban ang University of Cebu ( UC) Baby Webmasters ug Don Bosco Technological Center (DBTC) Greywolves.
Ang Dragons, nga kanhi kampiyon, adunay 3-2 nga baraha diin gikauban nila og puwesto ang University of San Jose Recoletos (USJ-R) Baby Jaguars.
Sa labing ulahi nilang duwa, gipagawas sa Magis Eagles ang kabangis nga nagpahimo kanilang kampiyon aron ilubong og taga liog ang Greywolves, 73-48.
Ang dakong kadaugan seguradong makahatag og dugang moral sa Magis Eagles sa ilang pagpakigbatok sa Dragons.
Sa main game, magsangka ang University of San Carlos (USC) Warriors batok University of Cebu (UC) Webmasters sa college division.
Ang duha ka mga kampo parehong naggunit og 2-3 nga rekord.
Sa mga duwa niadtong Dominggo, ang Warriors nasugamak sa 64-72 nga kapildihan batok sa University of the Visayas (UV) Green Lancers sa main game.
Ang Green Lancers nakigbahin na sab pagbalik sa liderato dala ang 5-0 nga rekord kauban ang Southwestern University (SWU) Cobras.
Sa laing duwa sa college, nakatilaw na og himaya ang University of Southern Philippines
Foundation (USPF) human nila gipatapsingan ang Cebu Institute of Technology University (CITU) Wildcats, 69-67.
Ang Panthers aduna na’y 1-4 nga nga rekord samtang ang Wildcats nahagbong sa 0-6 nga baraha.
Sa high school division, gipanglampornas sa UC Baby Webmasters ug USJR Baby Jaguars ang ilang tagsatagsa ka kontra.
Gipangbiktima sa Baby Webmasters ang USPF Baby Panthers, 77-49, samtang gipangkastigo sa Baby Jaguars ang SWU Baby Cobras, 83-62.