Way SK ug barangay elections?

DAKO ang posibilidad nga di madayon ang eleksiyon sa barangay ug Sangguniang Kabataan (SK) nga gikatakda karong buwan sa Oktubre 2016.

Mismo si Presidente Rodrigo Duterte pabor sa pag-uswag tungod sa mga pagduda nga gamiton sa umaabot nga eleksiyon ang kuwarta nga halin sa ilegal nga drugas.

Nasayod na ang kadaghanan sa pagkadiktador og utok ni P-DUT. Laktod pagka estorya, ang gusto maoy matuman kay siya man ang hawod.

Samtang pareho og baruganan ang presidente sa mayoriya sa Kongreso ug Senado sa pag-uswag sa piniliay. Apan ang balaod gikinahanglan pang pandayon ubos sa ilang pagpasar.

Hinuon sa pagkamabuotbuoton sa presidente nagbunga man sab og maayo ang pipila niini ka mga hukom. Sama sa kaso sa patay sa mga durugista nga gisaway sa human rights international.

Tan-awa ang gihimo ni P-DUT, gisumbalik og saway ang United Nations (UN) nga nagmando kaniya sa pagsunod sa balaod.

Duna may punto ang UN ug nakaigo sab sa iyang punto ang presidente. Di man gud makairog ang balaod samtang naay korapsyon. Ug sakto sab ang UN, ang balaod maoy maghari.

Timan-i di solusyon ang paghimo og krimen aron masulbad ang krimen. Ang mahitabo magbinaslanay nalang ta niini pinaagi sa pinatyanay kon di erespeto ang balaod.

DRUG LORD GIPATAY

Wa muwahi sa balita ang “Mata sa Agila, dihang gipatay ang magtiayong Melvin ug Merian Odicta, ang giingong drug lord sa Ilo-Ilo City.

Diha diha sayo sa buntag niadtong Dominggo, mibagting ang akong cellphone. Sa akong pagtubag, balita man diay sa pagpatay ni Odicta gikan sa usa ka inahan nga taga Ilo-Ilo, diin ang iyang anak nagguba ang kaugmaon kay biktima man sa paggamit og drugas.

Kalipay ang gibati sa inahan diri ka nako nga nagdetalye sa maong panghitabo. Apil sa iyang gipa nganan sa among panagsulti nga usa sa mga drug lord sa Ilo-Ilo nag apelyedo og Mabilog, hangtud karon pabiling gawasnon.

Tan-awa, daghan man lagi ang nangalipay sa kampanya ni P-DUT sa patay sa drug personalities.

Samtang gihimakak sa kapulisan sa Ilo-Ilo ang responsibilidad sa kamatayon ni Odicta nga gipasangil sa kabanay niini.

Kini untang pinatyanay angay imbistigahon. Naay sindikato nga nagpaluyo sa pagpatay aron di makasuka sa pangan sa mga pulitiko ug dagko sa kapulisan nga nalambigit.

Hinuon, lisud kaayo ni nga tahas. Kay taphaw lang ang kalipay sa katawhan sa maong kampanya.

Kay kadto diay nga gipatay nga drug personalities aron di makasuka sa kalambigitan sa mga dagko nga anaa sa gobiyerno.

Kon mao ni, naisahan ang presidente. Ug moingon na lang ta nga taphaw ang kalipay sa mga nagmalipayon! (efrenlonzon68@gmail.com Text: 09427930111)