Puya gisunog sa mama

(Napatik sa Superbalita Davao, Agusto 29, 2016)

USA ka inahan ang pasakaan og kaso pinaagi sa regular filing sa korte human iyang gisunog ang fetus nga iyang gituyo sa pagpakuha niadtong 12:40 sa udto niadtong Sabado, Agosto 27.

Ang pagsunog nahitabo sa sagbutan nga bahin sa Block 2, Purok Lourdes, Carmelite Road, Barangay Buhangin Proper, dakbayan sa Davao.

Base sa inisyal nga imbestigasyon sa Buhangin Police Station, giila ang suspek nga si Angelica (bansagon gitago sa SuperBalita), 22, nagpuyo sa Barpa, Barangay Leon Garcia, Agdao District.

Ang gihimo ni Angelica nasakpan sa iyang ig-agaw nga menor de edad.

Ang bata daling misumbong sa iyang nakita ngadto sa iyaan nga si Rhodora, 40, nagpuyo sa Purok Lourdes, Carmelite Road.

Si Rhodora daling miadto sa gisunogan apan wa na niya maabtan si Angelica, iyaha nalang nakita ang nasunog nga fetus nga gisud sa plastic container.

Daling nagpahibawo sa kapolisan si Rhodora kinsa nagbutyag nga si Angelica ang inahan sa fetus nga gilubong rasab nila dayon.

Giadto dayon sa kapulisan ang pinuy-anan ni Angelica apan wa kini makita hinungdan nga regular filing nalang ang ipasaka nga kaso.

“Ang iyaan maoy mopasaka og kaso pinaagi sa regular filing aron di daw maanad,” sulti ni P/Cinsp. Milgrace Cajes Driz, hepe sa kapulisan, nga nahinabi sa Superbalita niadtong Dominggo, Agosto 28.