Di mobiya sa Team Rama
NANINGOG na ang mga konsehal sa Team Rama kinsa gihugonhugon nga mamiya sa ilang partido sa hustong panahon.
Si Konsehal Jerry Guardo, kinsa igsuon ni magpapatigayon Jonathan ug Jeson Guardo kinsa mga kaalyado sa Bando Osmeña Pundok Kauswagan (BOPK) ni Mayor Tomas Osmeña, nihatag og katin-awan sa isyu.
“Honestly, as a Christian, duna koy prinsipiyo ug baruganan ug mitan-aw kog utang kabubut-on sa mga supporter sa Team Rama, mga barangay official ug kang former mayor Michael Rama nga mihatag pagsalig kanako. Di ko makaako nga mobiya sa Team Rama,” padayag ni Guardo.
Si Konsehal James Cuenco niingon nga di mahitabo nga mobiya siya sa Team Rama sanglit iyang gihulagway nga ‘tighilot’ sa mga kasungian nga nahitabo sud sa partido.
Iyang gihulagway nga aduna pay purohan nga mabalik sa Team Rama si Konsehal Dave Tumulak sa ilang grupo ug Konsehal Hanz Abella nga iyang gihulagway nga di mobiya sa grupo nga ilang natukod niadtong 2010.
Iyang gisaysay nga nagkaestorya si Abella ug Presidential Assistant for the Visayas Michael Dino sa miaging adlaw ug nibutyag ang konsehal nga suod nga higala ni Abella nga manumpa sila atubangan ni Presidente Rodrigo Duterte sa sunod nga mga semana.
Matod ni Cuenco nga di mobiya si Hanz sa Team Rama ug aduna lang kini nahiubsan nga ilang kauban nga konsehal gumikan sa mga negatibong komentaryo.
Gisuwayan og tawag sa Superbalita Cebu si Abella apan sa gihapon, way motubag sa iyang cellphone.
Si Konshal Joel Garganera nirespeto sa hukom ni Tumulak apan iyang gihulagway nga ang gibuhat sa iyang kauban nga “sama na sa uyab ta unya mahibawo ta sa silingan nga nagbuwag nata”.
AYAW HILABTI
Kon si Bise Mayor Edgardo Labella maoy masunod, di angayan tangtangan sa ilang komitiba si Tumulak ug Abella kinsa maoy naghupot sa Committee on Health, Committee on Education ug Sports diin siya mismo nakahinabi sa duha ka konsehal ug nisalig sa pamahayag sa iyang kauban sa konseho.
“They should maintain, not to touch them let them be the chairperson,” padayag ni Labella
Gisalikway usab sa bise mayor ang pamahayag ni Mayor Tomas Osmeña nga sa umaabot nga panahon, biyaan ni Labella ang Team Rama.
Ang bise mayor nibutyag nga sila ni kanhi mayor Mike Rama maoy nagumol sa grupo ug di mahitabo nga iyang biyaan ang ilang grupo ug mahitabo man gani nga wa na silay kauban, siya moretiro na sa pulitika.