Barok luwason
GIKOMPIRMAR sa hepe sa Police Regional Office (PRO) 7 nga dunay plano ang grupo ni Alvar Alvaro alyas Barok nga luwason siya sud sa Cebu Provincial Detention and Rehabilitation Center (CPDRC).
Gihagit ni PRO 7 Director Noli Taliño ang grupo ni Barok nga kini buhaton kay andam ang kapulisan.
Giingong ang gaway ni Barok nagplano nga paikyason siya sa bilanggoan.
Tungod niini, dunay gipadala nga mga sakop sa Regional Public Safety Battalion ang Cebu Provincial Police Office aron moabag sa paghatag og seguridad sa tibuok building sa CPDRC.
Andam usab ang mga pulis nga makigpinusilay sa grupo ni Barok kon makig-away kini.
Apan nagpadayon karon ang pagsusi kon unsa ka tinuod ang hulga ug kon masuta nga ang grupo ni Barok ang nagplano niini, gihagit ni Taliño nga tinud-on aron makita nga kaya nila ang kapulisan.
“Kung talagang ire-rescue si Barok ay subukan nila, basta subukan nila,” matod ni Taliño.
Dugang sa heneral nga duna pay mga gaway ang grupo ni Barok sa dakbayan sa Danao ug mga silingang lungsod bisan kon napatay na usab sa mga pulis ang laing kauban nga mao karon ang target sa kapulisan.
Hutdon silang tanan, bahad ni Taliño kon magpadayon nga mosukol ang grupo sa gihimo nilang anti-drug operation.
“Uubusin natin kung lalaban sila sa police. Syempre mauubos sila, dapat mag-surrender na lang,” matod ni Taliño.
Duna na silay mga ngalan kinsa kining grupo nga sunod nilang gukdon sa ilang antidrug operation.
Samtang gipasusi usab niya karon ang taho nga dunay iyang sakop nga nagranggo og police senior superintendent ang nalakip sa listahan ni Rolan Espinosa, alyas Kerwin.
Wa pa makabasa ang hepe sa kapulisan sa Central Visayas sa mga pulis ug mga naa sa gobiyerno nga nagdawatan og payola ni Kerwin nga gitakdang pasakahan og kaso sa Albuera police station.
Apan usa sa mga impormasyon nga nadawat sa mga tigbalita gikan sa lalawigan sa Leyte nga dunay police official nga nadestino sa lugar kaniadto nga naa na karon sa Central Visayas ang giingong naapil sa listahan.
Matod ni Taliño nga iya kining ipasusi kon kinsa ang opisyal. Matod sa kasaligang tinubdan sa Superbalita Cebu nga ang pulis maoy numero uno sa listahan ni Espinosa uban sa daghang police, congressman ug usa niini napili nga senador sa nasud.
Wa na hinuon ma surprisa si Taliño niini tungod kay iya na kining nadunggan kaniadto pa ug nagpaabot na lang sa kompirmasyon gikan mismo sa giilang big time drug lord sa Eastern Visayas.