SK, barangay elections iuswag sa sunod tuig

NAKADISIDER na ang Senado ug House of Representatives nga i-uswag sa 2017 ang piniliay alang sa Sangguniang Kabataan ug Barangay nga gikatakda unta sunod buwan.

Nagkasinabot ang mga magbabalaud nga iuswag kini gikan sa Oktubre 31, karong tuiga ngadto sa Oktubre 23, sa sunod tuig.

Matod ni House Majority Floor Leader Rodolfo Fariñas nga mosang-at sila og bill niini diin mao usab ang buhaton sa Senado.

Dugang ni Fariñas nga gusto sa Senado kaniadto nga sa uwahing Lunes sa Oktubre himuon ang piniliay apan ang mga senador nga gipangulohan sa pangu sa Committee on Suffrage Senador Edgardo Angara, niuyon sa sugyot sa Kamara nga himuon kining Oktubre 23 tungod kay duol na sa Kalag-kalag ang Oktubre 30.

Gikatakda nga mapasar sa second reading ang maong bill sa Septiyembre 5 o 6 ug sa third ug final reading sa Septiyembre 12.

Ang Commission on Elections sa ilang bahin malipayon nga nakadesider na ang kongreso kabahin sa pag-uswag sa piniliay sa wala pa ang giingon nila nga deadline nga karong adlawa.

Matod sa tigpamaba sa Comelec nga si James Jimenez nga mapasalamaton sila sa positibo nga lakang sa Kongreso kabahin niini.