Babaye napagan sa drug operation

(Napatik sa Superbalita Davao, Agusto 30, 2016)

DAVAO DEL NORTE - Patay ang usa ka babaye samtang nakasibat ang usa ka pusher atol sa gilusad nga drug bust alas 10:00 sa buntag niadtong Dominggo, Agosto 28.

Nahitabo ang operasyon sa kapulisan didto sa dan Calubana, Purok 4, Kalubihan, New Visayas, dakbayan sa Panabo.

Ang operasyon gilusad sa Bunawan Police Station sa dakbayan sa Davao apan gidala ang operatiba sa pusher ngadto sa nahisgutang lugar sa Panabo.

Ang giingong pusher giila sa iyang alyas nga “Dolphy.”

Si “Dolphy” midawat na unta sa markadong salapi, apan sa dihang nakabantay nga mga pulis ang namalit, gipusil niya kini gamit ang di matino nga kalibre sa armas.

Tungod sa iyang gihimo, mibawos ang mga pulis pagpusil kaniya, apan niadtong higayona miagi sa lugar si Carmelita Prajele, lumulupyo sa Purok 4, Little Panay, dakbayan sa Panabo.

Angkas ang biktima sa motorsiklo kinsa nakaangkon og sam a d pinusilan sa likod nga bahin sa lawas nga milapos sa dughan.

Gidala pa siya sa ospital samtang ang target nga si “Dolphy” malampusong miikyas sakay sa Mio nga motorsiklo.

Si Prajele gideklarang dead on arrival sa balay tambalanan.

Sa progress report sa kapulisan, si PO1 Riche Balingit, intelligence sa operatives sa Bunawan Police Station, mitahan sa iyang kaugalingon human aksidenteng naigo ang biktima sa iyang pagpusil sa suspek.

Si Balingit gikustodiya karon sa Bunawan Police Station.

Giandam na sa kapulisan sa Panabo Police Station ang pagpasaka og kaso batok sa pulis kinsa mag-atubang sab og kasong administratiba sa Police Regional Office-Davao Region.