Tinun-an gipuspusan, patay

(Napatik sa Superbalita Davao, Agusto 31, 2016)

PATAY ang usa ka Grade 7 nga estudyante human gitabangan pagpuspos og kahoy sa tulo ka mga lalaki alas 12:30 sa tungang gabii niadtong Lunes, Agosto 29.

Nahitabo ang insidente sa Sitio Nangalid, Barangay Datu Salumay, Marilog District, dakbayan sa Davao.

Ang biktima si Kneelad Dagcuan Masacud, 20, Grade 7 student, samtang ang suspek mao sila Marvin Baja Tabalba, Roel Salumay Bento, ug Ronel Salumay Bento, pulos nagpuyo sa Puro 1, Barangay Salumay.

Base sa journal sa kapulisan, mga suspek miadto sa balay sa biktima diin nangita sa usa ka Richard Dagcuan, apan ang biktima ang nakaatubang kanila. Nasayran nga naay daang dumot ang biktima ug mga suspek hinungdan nga nahitabo ang karambola. Suma sa report, wa na kasagang ang biktima kay gitabangan siyag puspos og kahoy sa tulo ka suspek. Daling gidala sa German Communi Hospital ang biktima apan gideklara siyang dead on arrival. Hinuon, nasikop gilayon ang mga suspek nga mag-atubang og kasong murder sa korte.