Nagtrayidor ba sila si Dave ug Hanz?

KARON klaro ug tataw na gyud ang unang gihugon-hugon nga paglayat ni Konsihal Hanz Abella gikan sa Team Rama. Gi-angkon ni Konsihal Abella ang iyang pagbiya sa Team Rama ug pagdeklarar nga independent sa akong pagpakighinabi kaniya pinaagi sa cellular phone niadtong miaging adlaw. Wala pa kini niya ibutyag sa publiko pinaagi sa press conference kay naghuwat pa siya sa insaktong panahon. Apan ato naman nga naunhan. Mas maayo nga giklaro gyud ni Hanz ang iyang desisyon kay sa magpaukon-ukon siya. Maayo nang prangka og plastada.

So, ning pagdeklarar ni Hanz nga mibiya na siya sa Team Rama ug nag-indepedente, duha na sila ni Dave Tumulak. Unang mibiya si Dave sa rason nga gihasulan na siya sa pulitika sa Konseho mao nga nag-independente siya. Pero karon ra na sila mag-independente. Ang sangputanan ani, sa madali ug madugay, motapon ra na sila sa Bando Osmena Pundok Kauswagan (BOPK) nga gipanguluhan sa ‘kanhi laos nga pulitiko’ kinsa maoy personal nga nag-agni kanila.

Pero dili nato mabasol sila si Dave ug Hanz nga motapon ngadto sa BOPK. Ila kanang kaugalingon nga desisyon ug aduna silay mga rason nganong nakakab-ot sila sa maong desisyon. Bisan personal ug pulitika ang rason, ato silang respituhan. Ang ilang kaugmaon sa pulitika ang nakataya ning ilang desisyon. Mao man gyud na ang pulitika. Dili kini angay ikasuko sa ilang mga kauban sa Team Rama ug ni kanhi mayor Mike Rama mismo.

Sa kaso ni Dave, matod pa, napugos siya sa paglayat gikan sa Team Rama isip bugti sa employment sa iyang mga igsuon diha sa City Hall ug aron makapangayo og mehuras alang sa iyang mga konstituwente. Kon magpabilin siya sa Team Rama wa siyay makuha. Para nako mas praktikal ang gihimo ni Dave. Kini alang usab sa kaugamaon sa iyang political career.

Si Hanz, sa iyang bahin, magpabilin unta siya sa Team Rama samtang mosuporta usab sa mga programa sa kasamtangang mayor. Apan gisaway naman hinuon siya sa iyang mga kauban kay ‘ nahalin’ na kuno ngadto sa BOPK. Gitawag pa siya og ‘ opurtunista ug trayidaor sa iyang mga kauban. Aw, mas maayo pa, matod niya, modeklarar na lang siyang independente.

Walay plano si Hanz nga opisyal nga manumpa sa BOPK. Ang iya lang nga iyang suportahan ang mga progama sa administrasyon o bisan ang Team Rama kon ang ilang tumong mao ang kaayuhan sa katawhan ug kalambuan sa dakbayan. Nagtrayidor ba sila Dave ug Hanz? Aw, para sa taga Team Rama naghudas sila. Pero para nako dili man siguro kay kaayuhan man sa dakbayan ang ilang tinguha sa ilang pagbiya.