Sakto ang pagtudlo kang Sitoy

SUGOD Septiyembre 1, 2016, si Mlbn. Adelino B. Sitoy, kanhi mayor sa lungsod sa Cordova Sugbo, adto na mag-opisina sa Malacañang human siya itudlo ni Presidente Rodrigo Duterte nga Presidential Adviser on Legislative affairs, ug sa samang higayon siya maoy mangulo sa Presidential Legislative Liaison Office.

Ang iyang pagkatudlo sa maong katungdanan maisip nga dakong dungog dili lamang kang Mayor Addy Sitoy, kondili, lakip na sa mga Sugboanon partikyular sa iyang mga katagilungsod sa Cordova diin si Addy, (tawag sa iyang mga higala), lumad gayod sa Cordova. Napili siyang bise mayor sa Cordova sa miaging election apan igo lang milingkod og usa ka buwan kapin, iyang gibiyaan tungod sa tawag sa laing katungdanan nga gisangon kaniya sa Presidente.

Wa masayop si Presidente Rodrigo Duterte sa pagtudlo kang Mlbn. Adelino B. Sitoy sa maong katungdanan kay usa siya ka eksperto kun batid sa balaod. Adunay katakos nga mohupot og dagkong katungdanan sa atong gobyerno.

Si Sitoy, sa wala pa mosulod sa politika, usa ka lubasang radio commentator, journalist ug creative writer, duhay suwab ang iyang dagang (bilingual), ug gipalabi niya ang atong pinulongang binisaya.

Sa nagtungha pa siya sa abogasiya sa University of San Carlos, giila siyang maayong laking orador, miyembro siya sa YOL, Youth for Osmena Leadership ug usa siya sa mga sinaligan nga tigpamaba ni anhing Sen. Serging Osmeña panahon sa kampanya.