Damgo ni Filoteo

HATAAS ang damgo ni Filoteo. Saylo pa sa gilubgan sa mga bituon sa langit. Apan wa niya ipahibawo kini sa iyang mga kauban sa trabaho. Bisan ang iyang asawa wa niya sultihi.

Usa lang siya ka ordinaryong office clerk sa usa ka ahensiya sa kagamhanan sa Sugbo. Nakahuman tuod siya sa kolehiyo, apan hinay siyag pangutok. Iya kining gidawat nga depekto sa iyang pagkatawo. Apan ning higayuna ipakita niya nga siya mahibawo. Pailhon niya sila kon kinsa si Filoteo Bacasmas.

Adlawng natawhan sa ilang labaw. Duna siyay nahunahunaan. Sa gabii sa selebrasyon, sa wa pa ang mga bisita, nagbaguod siya sa lima ka mga inasal nga dagkong pabo. Mituktok siya sa pultahan. May miabli nga usa ka guwangon, apan guwapang babaye.

“Ma’am, diay akong gida para kang Sir, regalo ni sa iyang birthday.”

“Uy, kalami ani, Dong. Paborito ra ba ni John kining pabo. Dayon sa sud.”

“Di na lang, Ma’am, kay nagdali ko, ingna lang si Sir nga gikan ni Filoteo iyang clerk.”

Gibutang niya ang pinutos og silopin nga mga inasal sa ibabaw sa kabinet sa daplin ug mitalikod dayon. “Salamat, Dong, ha.” Nadungog niya ang paapas nga pulong sa guwangong babaye nga sa iyang pagtuo asawa sa ilang ‘regional director’ nga si Engr. John Lawgan.

Pagka sunod adlaw wedding anniversary na sad sa ilang regional director. Ipaihaw niya ang binuhi niyang baboy aron aslon ug iregalo sa ilang labaw. Iya kining himuon aron matuman gyud ang iyang damgo.

“Naunsa ka, Filo? Ang una mong gihilabtan mga pabo, karon, baboy na sad! Para pista baya na, unsa na man lay atong ihawon, kagwanga ka?” Siga kaayog mata nga nagtanaw ang iyang asawa kaniya. Sa ilang atbang ang duha ka tawo nga mangangasal.

Way nahimo si Ramona sa iyang bana. Naasal gyud ang baboy ug gihatod niya sa balay sa regional director nga hastang lipaya nga nakakita sa dako nga inasal ni Filo. “You are a good fellow, Filoteo, maayo kang paliwatan!” Sa director nga dako kaayog ngisi.

Nahibaw-an ni Filoteo nga mi- retire si Ely Tan, ang ‘provincial operations officer.’ Gisultihan dayon ni Filoteo ang director nga gusto niya ang posisyon nga nabakante. Wa kini motingog dayon. Daw may gihunahuna. Misungag sa dughan ni Filoteo ang kakulba. Kon di niya makuha ang posisyon, mapusgay ang iyang damgo.

“Buyno, Filoteo, tungod kay ikaw thoughtful nga kawani, imo ang posisyon, way magbuot nako, ako ang regional director.” Sa iyang nadungog mora siyag gibunlot sa langit. Matuman na ang iyang gidamgo nga madato. Makapalit na siyag mga yuta ug ubang kabtangan.

Pagka gabii, sa agni sa iyang labaw, nangadto sila sa Jaguar, luho nga KTV Bar, aron manginom uban sa mga matahom nga GRO. Gigasto niya ang usa niya ka suwelduhan nga iyang nakubra. Pastilan, nakasabak siyag matahom nga GRO sa unang higayon sa iyang kinabuhi. Natagbaw siya sa mga hawok niini. Kalami!

“Ingon ani ang imong kinabuhi kon imo na ang posisyon. Sultihan tika kon unsaon pagpanguwarta, apan 50% gyud ang ako.” Nahibawo siya sa panguwarta. Dako ang komisyon gikan sa mga tag-iya sa barko nga kargahan sa mga kargamentong bugas sa ahensiya. Unya, naa pay diversion sa mga kargamento nga dako kaayo ang halin. Kadato unya niya!

Pagka buntag wa siya maka-report sa opisina kay labad ang iyang ulo. Apan iyang nahibaw-an nga nagubot ang buhatan kay gidakop ang ilang direktor tungod sa kasong pangurakot. Diha-diha natiurok siya. Mora siyag nalambahan sa kalibutan. Damgo niya natuasik! Kinsa na may mo-back-up niya? Nakita niya karon ang iyang asawa nga siga kaayog mata nga nagtan-aw niya. Patay! Wa na siyay suweldong ikahatag.

(KATAPUSAN)