Mangurog

Dear Noy Kulas,

Ako si Jake, 22 years old, taga Bohol. Pirme ko magsunod sa imong column. Gusto unta ko mokuha og pagka maestro, apan ang akong problema kay kon dunay presentation atubangan sa akong mga classmate, di ko makasulti, mangurog man hinuon ko.

Unsa ang angay nakong buhaton? Palihug tambagi ko.

JAKE,

Jake,

Di na ikahibung nang mangurog ka atubangan sa imong mga classmate kon motabi ka. Ingon ana sab ko sa una dihang bag-o pa kong nagtungha sa college. Apan sa kadugayan, sa pagsige og atubang sa akong mga classmate kon mo- report ko, nagkaanam og kawagtang hangtod nga naanad na ko. Makalingaw na gani kon mag- report ko.

Huna-hunaa nga imo ra silang classmates, sama nimo ra sila og level. Di ka angay nga mahadlok nila. Ikaduha, pangandam og maayo sa imong report. Pag- research ug pag- anticipate sa ilang mga pangutana ug unsay imong itubag. Mao ni ang kanunay nakong gibuhat basta duna koy lectures sa gawas sa opisina. Andaman nako a week before.

Ikatulo, relax lang. Ayaw pagsige og huna-huna nila ug sa imong report. Breath deep samtang nangandam na ka sa pagsugod. Ginhawag lawom samtang mag- report ka. Ayaw usab pagdali.

Han-aya tanan pipila ka adlaw sa di ka pa mo- report. Kon andam ka na, di ka maratol. Basta timan-i, maanad ka ra madugayan.

Usa pa sab, kon ikaw maestro, ubos na ang level sa imong mga estudyante. Busa ayaw kahadlok.

NOY KULAS (Alang sa imong problema, e-mail sa kulassuper@sunstar.com.ph ug rojval69@yahoo.com)