Love is not blind
SA
unang higayon naglagot ko kang Mon. Ang pag-angkon niya nga wa siya makapugong sa iyang kaugalingon maong nahagkan ko niya. Usa kini ka dakong timailhan nga huyang siya, di makamaong mopugong sa iyang gibati. Di makamaong maghunahuna kon unsay resulta sa iyang gibuhat, kon kini makapasakit ba sa binuhat nga gibuhatan niya sa ingon.
Nangayo man tuod siya og pasaylo but the damage has been done.
Miagpas si Mon nako dihang nakagawas na ko sa karenderya nga among gikan-an duol sa university nga among gitunghaan. Gitawag ko niya pero wa ko siya tagda. My emotion maoy nagpatigbabaw sa akong kaugalingon. Di ko gusto nga ikaestorya si Mon.
Pagka ugma, samtang nag-esnak ko sa school canteen, miduol si Mon nako. Human niya ipahimutang ang iyang giorder sa ibabaw sa lamesa, milingkod dayon siya sa akong atbang. “Hi!” Gikusmoran ko si Mon. Nagdali kong mitindog ug gibiyaan ko siya.
“Hi sa imong kabuang!” Nagyawyaw ko nga migawas sa canteen. Midiretso ko sa akong classroom. Hangtod nga nahuman ang akong klase niadtong adlawa, ang kalagot ko kang Mon wa gyud mawala sa akong hunahuna. Unya, sa paggawas ko sa school campus, naghuwat diay siya nako. Gisulingahan ko siya. Nagdali kong milabang sa pikas dalan aron adto ko mag-atang og kasakyan para sa akong pagpauli.
This time, I say to myself nga di para si Mon nako. Nasuta ko sab sa pinitik sa akong kasingkasing nga di gugma ang gibati ko niya. Kanunay ko lang diay siya mahunahuna tungod kay siya ra ang lalaki nga nakahawok sa akong aping. This is the reason kon nganong kanunay ko siyang mahunahuna. “What? Gi- basted nimo si Mon?” “Sus, kaanugon sa iyang kaguwapo ug pagka anak og dato, uy, Marjory? We’re expecting nga sugton mo gyud siya.” “Kinsa man diay ang imong love, si Andrie? My God!” “Buta gyud diay ang gugma, da.” Nakapanglingo ang akong mga amiga dihang gisultihan ko sila nga gibalibaran ko na si Mon sa iyang gugma nako. Nangaon mi niadtong tungora sa McDonald’s sa Fuente. Dominggo niadtong adlawa ug wa mi klase.
“Ayaw mo paghunahuna ana, uy! Di man tinud-anay ang gugma ni Mon nako. Gusto lang niyang i- prove sa iyang kaugalingon nga kaya ko niyang mahimong uyab. Nakita ko na ang tinuod niyang pagka tawo, uy! Ug correction, ha. Di buta ang gugma.”
Nagtinan-away ang akong mga amiga sa usag usa. (TAPUSON SUNOD GULA)