Puerto Rican champ masaligon batok ni Ancajas karong Sabado
BISAN pa man tuod ang ania sa nataran sa iyang kontra, apan dako ang pagsalig ni McJoe Arroyo nga madepensaan og madala ra gihapon niya og balik ang World Boxing Organization (WBO) superflyweight title didto sa Puerto Rico.
Karong Sabado, si Arroyo modepensa sa iyang kampyonato batok sa Filipino challenger nga si Jerwin Ancajas sa Philippine Navy Gymnasium sa Taguig.
Miabot sa Manila si Arroyo niadtong Lunes sa buntag human sa 24oras nga biyahe.
Uban sa iyang trainers nga sila si Anthony Otero ug Alex Caraballo ug ang chielf handler nga si Peter Rivera, si Arroyo mipahigayon sa iyang ensayo sa Elorde Sports Center saSucat Road, Paranaque.
Matod ni Arroyo nga iya nang natunan ang estelo ni Ancajas ug gipangandaman na kini kaniya bisan ug unsa pay buhaton sa lumad nga taga Davao.
Ang titulo nalabni ni Arroyo sa niaging tuig human niya mapildi si King Arthur Villanueva didto sa El Paso, Texas.
Ang ArroyoAncajas fight libre alang sa publiko isip pahalipay ni Manny Pacquiao ngadto sa publiko. Si Pacquiao moaway usab karong Nobiyembre 5 didto sa Las Vegas, Nevada.